Qazaqstanda qashyqtyqtan jumys isteý múmkindigi bar barlyq kásiporyndar men mekemeler osy rejimge aýysýǵa mindetti, dep habarlaidy QazAqparat.
Bul týraly QR Eńbek jáne halyqty áleýmettik qorǵaý ministri Birjan Nurymbetov Ortalyq kommýnikatsiialar qyzmetindegi brifingte aityp berdi.
«Eldegi tótenshe jaǵdaiǵa bailanysty birqatar qyzmetkerlerdiń jumys rejimi ózgerýde. Osy oraida jumys berýshilerge úlken áleýmettik jaýapkerishlik tanytyp, eńbek zańnamasyn tolyq saqtaýǵa shaqyramyn. Jáne de jumysshylar óz eńbek quqyqtaryn bilýi óte qajet», - dep atap ótti ministr.
Onyń aitýynsha, búgingi tańda barlyq kásiporyndar, mekemeler qashyqtyqtan jumys isteýge múmkindigi bolsa, onda qashyqtyqtan jumys isteý rejimine kóshýge mindetti. Bul Eńbek kodeksiniń 138-babymen retteledi.
«Qashyqtyqtan jumysqa kóshkende, eńbekaqy tóleý táirtibi ózgermeidi. Bul jerde azamat óziniń jumys ornynda emes, úiden jumys atqarý múmkindigi bolady. Eńbek kodeksi boiynsha, oǵan jumys berýshi tiisti jaǵdai jasaýǵa mindetti jáne jalaqysy ai saiynǵy alyp júrgen kólemde tólenetin bolady», - dedi B. Nurymbetov.
Eske sala ketsek, QR Prezidentiniń Jarlyǵymen Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty azamattardyń ómiri men densaýlyǵyn qorǵaý maqsatynda Qazaqstan Respýblikasynyń barlyq aýmaǵynda 2020 jylǵy 16 naýryz 08 saǵat 00 minýt pen 2020 jylǵy 15 sáýir 07 saǵat 00 minýt aralyǵynda tótenshe jaǵdai engizildi.
Sondai-aq, Qazaqstan azamattaryna 15 sáýirge deiin el aýmaǵynan shyǵýǵa tyiym salyndy.
