QR Bilim jáne ǵylym vitse-ministri Sholpan Karinova qashyqtan oqytý aiasynda internet platforma arqyly bilim alyp jatqan oqýshylar týraly aitty, dep habarlaidy QazAqparat.
«Tórtinshi toqsan aiasynda barlyq mektepterde qashyqtan oqytýdyń ekinshi aptasy aiaqtaldy. Onyń nátijesinde barlyq mektepte bul jumystyń qalypty jaǵdaida júrgizilip otyrǵanyn baiqadyq. Ózderińiz bilesizder, qashyqtan oqytýdyń birneshe formaty usynylǵan bolatyn. Osy aptanyń ishindegi derekterge qarasaq, 2,4 mln oqýshy men muǵalim internet platformany paidalanyp, jumys istep otyrǵanyn kórip otyrmyz. Internet jýrnaldar júiesinde de, onyń ishinde Kúndelik júiesinde oqýshylar men muǵalimderdiń belsendi jumysy baiqaldy», - dedi vitse-ministr Ortalyq kommýnikatsiialar qyzmetindegi onlain brifingide.
Onyń sózine qaraǵanda, telearnalardaǵy sabaqtardy 800 myńnan astam oqýshy kúndelikti kórip otyr.
«Muǵalimderdiń oqýshylarmen keri bailanystary da qoljetimdi quraldar arqyly jetkizilýde», - dedi Sh. Karinova.
