Negizgi qashyqtan oqytý protsesi ár mekteptegi sabaq kestesine sáikes ótedi. Bul týraly «Habar 24» telearnasynyń tikelei efirinen QR Aqparat jáne qoǵamdyq damý ministri Dáýren Abaev aitty, dep habarlaidy "Ult aqparat".
«Elimizde qashyqtan oqytý protsesin bastaýǵa daiyndyq jumysy júrgizilýde. Jumys toby quryldy. Álem elderiniń qashyqtan oqytý tájiribesi zerdelendi. Ministrlikte qurylǵan jobalyq keńseniń usynystaryn eskere otyryp, óz tujyrymdamamyzdy aiqyndadyq. Negizgi kontent retinde televiziialyq sabaqtar, daiyn tsifrlyq resýrstar usynylady», - dedi ministr.
Onyń atap ótýinshe, televideniege 2 myńnan astam sabaq túsiriletin bolady. Qazirgi tańda mundai sabaqtardyń 200-ge jýyǵy daiyn.
«Bir aityp ótetin jaǵdai, bul resýrstardyń barlyǵy pedagogqa jáne oqýshyǵa qosymsha aqparat bolyp sanalady. Negizgi qashyqtan oqytý protsesi ár mekteptegi sabaq kestesine sáikes ótedi. Sabaqty ótkizý ýaqyty 30 minýtty quraidy. Oqýshy, muǵalim, ata-ana keri bailanysty «Kúndelik», «Bilim al» mektep júieleri arqyly ornatatyn bolady. Barlyq ádistemeler, nusqaýlyqtar daiyn», - dedi Dáýren Abaev.
