Qashaǵan ken ornynda gazdyń shyǵýy belgilerine bailanysty jumys toqtatyldy, - dep habarlaidy "Ult aqparat".
Aqparatty Soltústik Kaspii jobasynyń operatory - NCOC (North Caspian Operating Company) kompaniiasy rastady.
"3 tamyzda óndiris alańynda gaz ketý belgileri anyqtalýyna bailanysty «Bolashaq» munai men gazdy keshendi daiyndaý qondyrǵysynyń jumysy qaýipsiz jolmen toqtatyldy.
Standartty protsedýralarǵa sáikes gaz datchikteriniń iske qosylýyna bailanysty qondyrǵylardaǵy qysym alaý júiesi arqyly túsirildi", - delingen kompaniia usynǵan málimette.
Oqiǵa kezinde adamdar densaýlyǵyna ziian kelmegen.
"Batys Eskenedegi aýa sapasyn baqylaý beketterinde lastaýshy zattardyń shekti ruqsat etilgen normadan asýy tirkelmedi. Qazirgi ýaqytta óndiristi qalpyna keltirý jumystary júrgizilip jatyr. Biz óndiristi tezirek qalpyna keltiremiz dep úmittenemiz", - dedi NCOC baspasóz qyzmetindegiler.
