Qashanǵadaǵy munai óndirý jumystary josparly merzimnen 10 kún erte jandandy, dep habarlaidy QazAqparat tilshisi.
Qashaǵan kenishindegi tehnikalyq qyzmettiń josparly aldyn alý sharalary ýaqytynan 10 kún erte bitip, munai óndirý jumystary qaita jandandy. Ázirge kenishte táýligine 70 myń barrel munai óndirilýde. Al maýsym aiynyń basynda óndiris 100 paiyz kúshine enip, táýligine 370-400 myń barrel munai alynbaq.
QR Energetika ministri Qanat Bozymbaevtyń aitýynsha, tehnikalyq qyzmettiń aldyn alý sharalary 35 kúnniń ishinde sátti aiaqtalǵan.
«Bastapqyda atalmysh jumystar 45 kúnde bitedi dep josparlaǵanbyz. Ministrlik pen munai kompaniiasynyń jedeldik tanytýy arqasynda 10 kún erte aiaqtadyq. Osynyń arqasynda jyl sońyna deiin jospardaǵydan 3 mln barrel munai kóp óndiretin bolamyz», - deidi ministr.
14 sáýirde Qashaǵan kenishiniń operatory «Bolashaq» zaýyty men «D» óndiristik aralynda kúrdeli jóndeý jumystaryn bastaǵan bolatyn. Osyǵan bailanysty kenishtegi munai óndirý jumystary tolyqtai toqtatylǵan edi. Qazirgi tańda kenishte qondyrǵylardy iske qosý jumystary júrip jatyr.
