Atyraý oblysyna jumys sapary aiasynda QR Premer-Ministri Asqar Mamin Qashaǵan ken ornynda ilespe gaz óńdeý zaýytyn salý máselesi jóninde keńes ótkizdi, dep habarlaidy "Ult aqparat" primeminister.kz saityna silteme jasap.
Qarjylandyrý máselesi, memlekettik qoldaý sharalary, gaz teńgerimi jáne atalǵan jobany iske asyrýdan kútiletin nátije týraly QR Ulttyq ekonomika ministri Rýslan Dálenov, Energetika ministri Nurlan Noǵaev jáne Atyraý oblysynyń ákimi Mahambet Dosmuhambetov, memlekettik organdar men ulttyq kompaniialardyń basshylary baiandady.
Qashaǵan ken ornynda ilespe gaz óńdeý zaýytyn salý jobasyn 2021 jyldyń sońyna deiin Atyraý oblysynyń Maqat aýdanynda, «Bolashaq» munai jáne gazdy keshendi daiyndaý qondyrǵysynan soltústik-shyǵysqa qarai 12 shaqyrym jerde jáne Eskene temirjol stantsiiasynan ońtústikke qarai 5 shaqyrym jerde iske asyrý kózdelgen. Jobalyq qýattylyǵy — jylyna 1 mlrd tekshe metr. Investor — «GPC Investment» JShS. Investitsiia kólemi - 860 mln dollar.
«Qashaǵan ken ornynda ilespe gazdy óńdeý zaýytyn salý elimiz úshin mańyzdy joba. Ol ken ornynda munai óndirýdi 12 mln tonnaǵa arttyrýǵa, sondai-aq qurylys kezeńinde 2800 ýaqytsha jáne paidalanýǵa berilgen soń 600 turaqty jumys ornyn qurýǵa múmkindik beredi», — dedi A. Mamin.
Úkimet basshysy zaýyt ónimi ishki jáne syrtqy naryqtarǵa shyǵarylatynyn atap ótti.
«Ótken jyldyń qazan aiynan bastap atalǵan jobany jan-jaqty zerdeledik. Búgingi otyrysty zaýytty salý týraly sheshim qabyldaityn qorytyndy jiyn retinde qarastyrý qajet», — dedi A. Mamin.
Atyraý oblysyna jumys sapary aiasynda Premer-Ministr, sonymen qatar munai-gaz salasy úshin jabdyqtar men quraýyshtardy óndiretin kásiporyndar — «Kaspii Pliýs», «International Pipeline Structure Solutions Caspian», «Caspian Contractors Trust Atyrau» JShS-yn aralady.
