QR Qarjy naryǵyn retteý jáne damytý agenttiginiń tóraǵasy Mádina Ábilqasymova qarjy sektoryn 2030 jylǵa deiin damytý tujyrymdamasy 2021 jyldyń birinshi toqsanynda aiaqtalatynyn aitty, dep habarlaidy QazAqparat.
Onyń aitýynsha, 2020 jylǵy mańyzdy oqiǵalar qarjy sektoryna edáýir áser etip, orta merzimdi bolashaǵyna yqpal etedi.
«Qarjy sektoryn damytýdyń jańa basymdyqtary men strategiialyq baǵyttaryn aiqyndaý úshin Agenttik Ulttyq bankpen jáne qarjy naryǵynyń qatysýshylarymen birlesip, qazirgi ýaqytta 2030 jylǵa deiin qarjy sektorynyń jańa tujyrymdamasyn ázirlep jatyr», - dedi Mádina Ábilqasymova.
Agenttik basshysy, qazirgi ýaqytta qarjy sektoryndaǵy jaǵdaiǵa qandai megatrendter áser etetin aitty.
«Birinshiden, bul biznestiń tiimdiligin arttyrý maqsatynda dástúrli biznes modeli bar qarjy institýttarynda jańa tehnologiialardy belsendi qoldaný. Ekinshiden, bul qarjylyq qyzmetterdi tutynýshylardyń jańa býynyn qalyptastyrý, onlain qyzmetter usyný. Úshinshiden, bul dástúrli oiynshylardyń naryqtyq úlesin arttyrý (jańa biznes-modelder) jáne tehnologiialyq kompaniialardyń (Fintech, BigTech) qarjylyq qyzmetter naryǵyna shyǵý maqsatynda jańa tehnologiialardy qoldaný arqyly biznes-modeldi ózgertý», – dep atap ótti Agenttik basshysy.
Ol álemdik naryqtaǵy qarjylyq institýttardyń kópshiligi klienttermen bailanys ornatýdyń tsifrlyq arnalaryn engizip, damytyp jatqanyn, sondai-aq qyzmet kórsetý tásilderin ózgertip, klientterdiń tájiribesin qalyptastyratynyn atap ótti.
Boljamdarǵa sáikes, fintehnika men iri tehnologiialyq kompaniialar naryqtyń jańa oiynshylarynyń arqasynda 2025 jylǵa qarai dástúrli biznes modelderi bar qarjy institýttarynyń kirisi 30%-ǵa tómendeýi múmkin.
«Bul jaǵdaida qarjy sektoryn damytýdyń úsh negizgi modelin ataýǵa bolady. Birinshiden. Ekojúie naryǵy. Ekinshi.Qarjy qyzmetterin usyna bastaǵan tehnologiialyq kompaniialar naryǵy. Úshinshi. Dástúrli qarjy institýttary, finteh-startaptar men tehnologiialyq kompaniialardy qosa alǵanda, naryqtyń barlyq qatysýshylarynyń bir ýaqytta básekelestigi men yntymaqtastyǵy bolatyn básekeli naryqtar», - dedi Mádina Ábilqasymova.
Osylaisha, ázirlengen qarjy sektoryn damytý tujyrymdamasy barlyq kórsetilgen álemdik tendentsiialardy eskere otyryp, otandyq qarjy júiesiniń ózgerýi men básekege qabilettiligin arttyrýǵa jaǵdai jasaýy kerek.
«Tujyrymdamanyń maqsaty - 2030 jylǵa qarai makroqarjylyq turaqtylyqty qamtamasyz etýge jáne eldiń turaqty jáne inkliýzivti ekonomikalyq damýyn saqtaýǵa yqpal etetin básekege qabiletti joǵary tehnologiialyq qarjy sektoryn qurý», - dedi ol.
Tujyrymdama aiasynda qarjy sektoryn damytýdyń 7 basymdyǵy anyqtaldy.
Birinshi basymdyq - qarjylyq turaqtylyqty qamtamasyz etý;
Ekinshi basymdyq - qarjy institýttarynyń básekege qabilettiligin arttyrý;
Úshinshi basymdyq - ekonomikany qarjylandyrýda bank sektorynyń rólin qalpyna keltirý;
Tórtinshi basymdyq - korporativtik basqarý sapasyn, táýekelderdi basqarý standarttaryn jaqsartý;
Besinshi basymdylyq - ashyqtyqty jaqsartý jáne qarjy institýttarynyń menshik qurylymyn ártaraptandyrý;
Altynshy basymdyq - qarjylyq inkliýziia men qarjylyq saýattylyqty arttyrý;
Jetinshi basymdyq - jańa tehnologiialar men innovatsiialardy engizý;
«2020-2025 jyldarǵa arnalǵan qarjylyq tehnologiialar men innovatsiialardy damytý tujyrymdamasy men «Tsifrlyq Qazaqstan» memlekettik baǵdarlamasynda kózdelgen sharalardy iske asyrý jumystary jalǵasady», - dedi Mádina Ábilqasymova.
Onyń aitýynsha, 2030 jylǵa deiin qarjy sektoryn damytý tujyrymdamasyn 2021 jyldyń birinshi toqsanynda aiaqtaý josparlanyp otyr.
