Qarjy piramidasynyń eki quryltaishysy Resei men Qyrǵyzstan aýmaǵynda izdestirilýde. Bul týraly Ishki ister ministrligi tergeý departamentiniń basshysy Sanjar Ádilov málim etti, dep habarlaidy "Ult aqparat".
«Negizgi quryltaishylar, iaǵni 12 kúdikti halyqaralyq izdeýge jariialandy. Ókinishke qarai, olardyń birazy azamattardyń shyǵymy túskenge deiin Qazaqstan aýmaǵynan tys jerde jasyrynyp úlgergen. Olardy anyqtaý men ustaý boiynsha jedel tergeý toby jumys istep jatyr. Qazirgi kezde 15 kúdikti ustaldy. Kún saiyn qylmystyq jaýapkershilikke tartylatyn kúdiktiler sany artýda», - dedi S. Ádilov Parlament Májilisinde tilshiler saýalyna jaýap bere otyryp.
Onyń sózine qaraǵanda, el turǵyndarynan alynǵan qarjynyń negizgi bóligi qolma-qol aqsha kúiinde jinalǵan.
«Qazir Qarjylyq monitoring komitetimen, Bas prokýratýramen birlese jymqyrylǵan qarjyny izdestirý sharalaryn atqarýdamyz. Búginde izdestirý sharalary barysynda 40 mln teńge tárkilendi. Tergeý organdarymen 21 páterge, 3 úige, 30-dan astam avtokólikke tyiym salyndy», - dedi Tergeý departamentiniń basshysy.
Sonymen qatar ol Qazaqstan boiynsha 13 óńirde qarjy piramidasyna qatysty qylmystyq árketter tirkelgenin naqtylady.
«Keltirilgen jalpy shyǵynnyń somasy 5 mlrd teńgeden astam. Tergeý barysynda jymqyrylǵan ashqa izdestirilip, qaitarylady. Kúdikti 12 adamnyń ekeýi shetelge qashyp ketken. Arnaiy tergeý toby Resei men Qyrǵyzstanǵa jiberildi. Tintý barysynda 42 myńnan astam kelisimshart alyndy. Sondyqtan aryz berýshilerdiń sany kún saiyn artady dep oilaimyz», - dedi Sanjar Ádilov.
Eske sala ketsek, QR Ishki ister ministrligi qarjy piramidalary men lombardtarǵa aldanǵan qazaqstandyqtardan aryz-shaǵymdar áli de túsip jatqanyn málim etken bolatyn.
Salymshylardyń sanyn kóbeitý úshin kompaniialar Qazaqstan estradasynyń jáne sport salasynyń juldyzdaryn tartyp, aýqymdy jarnama júrgizgen.
«Búginge deiin 2 myńǵa tarta shaǵym tústi. Kompaniialardyń aimaqtardaǵy barlyq keńsesine tintý júrgizilip, birlesken jumys týraly kelisimder, býhgalterlik qujattar, noýtbýk, keńse tehnikasy, zergerlik buiymdar men ózge de zattar tárkilendi. Tárkilengen qujattarǵa sáikes kompaniialar 42 myń adammen kelisimge kelgen. Qazirgi esep boiynsha shyǵyn mólsheri 5 milliard 411 million teńge bolyp otyr», - delingen IIM habarlamasynda.
