16 naýryzda qarjy piramidasyna aldanǵan salymshylardyń bastamashyl toby Nur-Sultan qalasyna jinalyp, Qazaqstan prezidenti ákimshiliginiń keńsesine hat tapsyrdy. Bastamashyl topty politsiia baqylap júrdi. Salymshylar «Garant 24», «Vygodnyi zaim», «Estet Lombard» qarjy kompaniialaryna bergen aqshalaryn qaitara almaǵanyna narazy.
Ózin «salymshylardy qorǵaý jónindegi respýblikalyq qoǵamdyq komitet úilestirýshisimin» dep tanystyrǵan Janar Dáýletova «bastamashyl topty politsiia tańnan beri baqylap, úiden shyǵarmai otyrǵanyna» shaǵymdandy.
- Hatymyzdy prezident ákimshiliginiń keńesine tapsyrǵymyz kelgen. Salymshylar máselesine úkimet pen parlament aralaspasa bolmaidy, - deidi ol.
Shymkent, Taraz, Oraldan kelgen bastamashyl top ókilderi salymshylardyń keibiri kóligin, keibiri páterin satyp, qarjy kompaniiasyna salǵanyn aitady.
Janar Dáýletovanyń sózinshe, salymshylar máselesimen ainalysatyn qoǵamdyq komitettiń 25915 adamǵa júrgizgen saýalnamasy barysynda olardyń 23 milliard teńgeden astam shyǵyn shekkenin kórsetken.
Qasym - Jomart Toqaevqa jazylǵan hatta «Aqshalarynan aiyrylǵan jas kelinshek tamyryn kesip, eki kishkentai balasy jetim qaldy. Jetisaidyń 49 jastaǵy turǵyny 2 naýryzda ózine qol saldy» dep jazylǵan.
Politsiia qyzmetkerleri bastamashyl topty nege úiinen shyǵarmai otyrǵanyn túsindirmedi. Keiinnen bastamashyl top ókilderi politsiia baqylaýymen prezident ákimshiligine hat tapsyrǵanyn habarlady.
Buǵan deiin Qazaqstannyń birqatar qalalarynda «qarjy uiymdaryna aldandyq" degen turǵyndar bilikten máselelerin sheship berýdi talap etken.
16 naýryzda Aqtóbede qalasynda salymshylar narazylyq bildirgen. Jeksenbide Qyzylordada bir top salymshy «Garant 24 Lombard» jetekshileriniń biriniń úiine baryp, aqshalaryn qaitarýdy talap etken.
Aqpan aiynyń sońynda ishki ister ministrligi «Garant 24 Lombard» kompaniiasy quryltaishysynyń Kishinevte ustalǵanyn, ony Qazaqstanǵa ekstraditsiialaý máselesi qarastyrylyp jatqanyn habarlaǵan.
