Aqtóbede qarjy piramidasy dep tanylǵan «Golden city-200» JShS-ne basshylyq etip, adamdarǵa shyǵyn keltirgen Qairat Iztileýge qatysty sot úkimi shyqty, dep habarlaidy QazAqparat tilshisi.
Byltyr «Qarjylyq (investitsiialyq) piramidany qurý jáne oǵan basshylyq etý» baby boiynsha Qairat Iztileýge qatysty tergeý júrdi. Oblystyq politsiia departamenti habarlandyrý arqyly jábirlenýshilerdi izdedi. Al búgin Aqtóbe qalasynyń №2 sotynda sottalýshy Qairat Iztileýge qatysty qylmystyq is qaralyp, úkim shyqty. Is materialyna súiensek, 2020 jyldyń qańtar aiynan bastap 2020 jyldyń aqpan aiyna deiin Q.Iztileýdiń qarjy piramidasy bolyp tabylatyn filialdy basqaryp, «Golden city-200» JShS zańsyz qyzmetin júzege asyrǵan. Jalǵan sharttar jasasyp, azamattarǵa joǵary syiaqy úshin tólemder alatynyna kepildik bergeni anyqtaldy. Qylmystyq is-áreketterdiń nátijesinde jábirlenýshilerge 71 550 000 kóleminde materialdyq zalal keltirildi.
«Sot otyrysynda sottalýshy qylmys jasaǵany úshin ózine taǵylǵan aiyp boiynsha kinásin moiyndady. Sottalýshynyń kinási kýálar men jábirlenýshilerdiń bergen aiǵaqtary, sot otyrysynda zerttelgen is boiynsha basqa da dáleldemelerdiń jiyntyǵymen dáleldendi. Memlekettik aiyptaýshy sottan Q.Iztileýge 7 jyl merzimge basshylyq laýazymdy atqarý quqyǵynan aiyra otyryp, 6 jyl 6 ai merzimge bas bostandyǵynan aiyrý jazasyn taǵaiyndaýdy surady. Jaza taǵaiyndaý kezinde jeńildetilgen jáne aýyrlatatyn mán-jailar eskeriledi. Sottalýshy Q.Iztileýdiń kámelet jasqa tolmaǵan balalary bar. Bul qylmystyq jaýaptylyqty jeńildetetin mán jailarǵa jatady. Memlekettik aiyptaýshy qylmystyq jaýaptylyqty aýyrlatatyn mán-jailardy anyqtamady. Sot úkimimen
Q.Iztileýge 7 jyl merzimge kommetsiialyq mekemelerde basshylyq laýazymdy atqarý quqyǵynan aiyra otyryp, 6 jyl 6 ai merzimge bas bostandyǵynan aiyrý jazasy taǵaiyndalǵan. Jábirlenýshilerdiń paidasyna 70 350 000 tenge óndirildi», - dedi oblystyq sottyń baspasóz qyzmeti.
Sot úkimi zańdy kúshine engen joq.
