Bas prokýror Ǵizat Nurdáýletov Májilis depýtattaryna qarjy piramidalaryn jarnamalaǵan tanymal adamdar nege jaýapqa tartylmaitynyn túsindirdi, dep habarlaidy QazAqparat.
«Shynynda da, qarjy piramidasyn uiymdastyrýshylar óz qyzmetin jarnamalaý úshin ataqty adamdardy tartqan. Formaldy túrde olardyń əreketterinde Ákimshilik quqyq buzý týraly kodekstiń 150-baby (qarjylyq (investitsiialyq) piramida qyzmetin jarnamalaý) quqyq buzýshylyqtyń quramy baiqalady. Alaida qylmystyq is boiynsha úkim shyqqanǵa deiin uiymnyń qarjy piramidasy bolyp tabylatynyn nemese tabylmaitynyn anyqtaý múmkin emes. Osyǵan bailanysty, jarnamalaý kezinde joǵaryda atalǵan uiymdar qarjy piramidalary bolyp tanylmaǵan. Sondyqtan Ákimshilik quqyq buzý týraly kodekstiń 150-baby boiynsha medialyq tulǵalardy əkimshilik jaýapkershilikke tartý úshin quqyqtyq negiz joq», -dep jazylǵan depýtattyq saýalǵa joldanǵan jaýapta.
Ǵizat Nurdáýletov depýtattarǵa bergen jaýabynda Almaty qalasynda tirkelgen osy sipattaǵy oqiǵanyń qazir qalai órbip jatqanyn da baiandaǵan.
«Biylǵy səýir-mamyr ailarynda Almaty qalasynyń politsiia departamentine qarjy piramidasyn qurý jəne basqarý («Astex.kz» JShS, «ACD technology» JShS jəne «Mýdaraba» JShS) faktisi boiynsha K. esimdi azamatqa qatysty sharalar qabyldaý týraly aryzdar kelip túsken. Qylmystyq kodekstiń 217-baby 3-bóliginiń 2-tarmaǵy boiynsha sotqa deiingi tergeý bastaldy. Joǵaryda atalǵan adam ustalyp, ýaqytsha ustaý izoliatoryna qamaldy. Tergeý jalǵasýda», - delingen jaýapta.
