Jedel-izdestirý sharalaryn júrgizý barysynda Almaty oblysy boiynsha Qarjylyq monitoring agenttiginiń aýmaqtyq departamenti «Elimai 2019» tutyný kooperativi túrinde qarjy piramidasyn qurǵan erli-zaiyptylar E.Kizbaev pen J.Ómirbaevany ustady, - dep habarlaidy vedomstvonyń baspasóz qyzmeti.
QR Qarjy monitoringi agenttigi baspasóz qyzmetiniń málimetinshe, Qazaqstan Respýblikasy Qylmystyq kodeksiniń 217-baby boiynsha Almaty oblysynda jáne QR basqa óńirlerinde «Elimai 2019» tutyný kooperativi qarjy piramidasyn qurý jáne oǵan basshylyq etý faktisi boiynsha qylmystyq ister tergelýde. Kúdiktiler Almaty oblysynyń ýaqytsha ustaý izoliatoryna qamaldy.
Qazirgi ýaqytta aldyn ala tergeý organyna 125-ten astam zardap shekken adam júgindi. Tergeý nátijeleri jábirlenýshilerdiń sany áldeqaida kóp bolýy múmkin ekenin kórsetip otyr.
«Osyǵan bailanysty Almaty oblysy boiynsha Ekonomikalyq tergeý departamenti zardap shekken azamattardy Ótegen batyr kenti, Battalhanov kóshesi 11a meken-jaiy boiynsha nemese +7 (727) 251-71-06 senim telefonyna habarlasýdy suraidy», - delingen Qarjylyq monitoring agenttiginiń baspasóz qyzmeti taratqan aqparatta.
