Qazaqstan Respýblikasy Qarjy ministrliginiń Qarjy monitoringi komiteti qarjy piramidasynyń qyzmeti qandai ekendigin ashyp kórsetip, qarjy qaqpandaryna túspeýdiń amalymen bólisti, dep habarlaidy "Ult aqparat" komitet saityna silteme jasap.
Qarjy monitoringi komiteti qarjy piramidasynyń belgisi bar uiymdy qurý jáne onyń qyzmetine ár túrli alaiaq shema arqyly azamattardy tartý jiilep ketkendigin eskertti.
Vedomstvo oǵan mysal retinde messendjer men áleýmettik jeli arqyly elimizdiń barlyq óńirinde sanaýly saǵatta tarap ketken «Kotel» nemese «Qara kassa» oiynyn atap ótedi. Alaida bir mezgilde júzdegen adamdy aldap túsirgen qarjy piramidasy kúirep, ony qurýǵa qatysqandar qur qol qalady.
Sonymen, jumbaq piramidanyń qyzmeti qandai jáne qarjy qaqpandaryna túspeýdiń amaly qandai?
Qarjy piramidasy – zańǵa qaishy investitsiialyq qyzmet, munda aldyńǵy qatysýshylarǵa beriletin tólemder jańa qatysýshylardyń qarajatyn tartý arqyly júzege asyrylady. Qarjy (investitsiialyq) piramidasyn qurý jáne ony basqarýǵa QR QK 217-babyna sáikes qylmystyq jaýapkershilik qarastyrylǵan.
Basqasha aitqanda, bul azamattardan zańsyz aqsha tartyp alýdyń eń belgili ári keń taralyp ketken ádis. Tańǵalarlyq jait, qarjy piramidasyna qosylý ádette azamattardyń óz erkimen jáne quqyqtyq súiemeldeýsiz júrgiziledi. Osylaisha, eshkim salynǵan qarjynyń qaitarylatynyna kepil bermeidi.
Qarjy piramidasynyń eń basty belgisi – óte kóp paida túsedi dep ýáde beriledi. Ústeme tek tek bir ret qana tólenýi múmkin, óitkeni kelesi jolǵysyn berýge odan da kóp qarjy kerek.
Ekinshi belgisi - kompaniia shynaiy ekonomikalyq nemese investitsiialyq qyzmetpen ainalyspaidy. Piramidalar ózin taýarlyq, nesielik, týristik, qurylys kompaniialary retinde kórsetedi. Alaida, shyndap kelgende eski salymshylarǵa barlyq tólem jańa salymshylardyń jarnasy esebinen tólenedi.
Úshinshi belgisi - mundai jobalardyń materialdyq-quqyqtyq bazasy joq, iaǵni, bul kompaniialar jańadan qurylǵan, qarjylyq esep tapsyrmaidy, kelisimshart jasamaidy nemese kelisimder tek uiymdastyrýshylardyń paidasyna jasalǵan ári QR zańnamasyna sáikes kelmeidi.
Piramidanyń tórtinshi belgisi - kompaniianyń qyzmeti tym jan-jaqty, sol arqyly kompaniia aiqyn ári naqty qyzmetiniń joqtyǵyn jasyrady.
Besinshi belgisi - áleýmettik jelilerdegi belsendi ári mezi etetin jarnama. Osyndai jarnamany taratý «Jarnama týraly» QR Zańyna sáikes emes bolǵandyqtan, atalmysh zańsyz biznestiń barlyǵy áleýmettik jeli men messendjerlerde keńinen taralady.
Altynshy ári óte mańyzdy belgi – qarjy regýliatory litsenziiasynyń bolmaýy. Kez kelgen salym eger syiaqynyń merzimi men mólsherlemesi kórsetilgen bolsa depozit bolyp sanalady. Halyqtan salym alý úshin QR Ulttyq bankiniń litsenziiasy qajet, jáne ol ekinshi deńgeidegi bankterde bar. «QR ekinshi deńgeidegi bankterinde ornalastyrylǵan depozitterge mindetti kepildik berý týraly» zańǵa sáikes bankter halyqpen jumys jasap, salynǵan qarajattyń qaita berilýine kepildeme beredi. Biraq qarjy piramidasynyń uiymdastyrýshylary litsenziiany qajet etpeitindigin málimdeidi.
QR QM Qarjy monitoringi komiteti joǵaryda kórsetilgen belgileri bar kúmándi uiymdarǵa qarajatty salýdan bas tartýǵa shaqyrady.
Qarjy piramidasyna qatysty másele týyndasa komitettiń senim telefondaryna habarlasý kerek 8 (7172) 708-478, 8 (7172) 709-920.
