Foto: mvd.gov.kg
Qarjy piramidasyn qurǵany úshin izdeýde júrgen qazaqstandyqtyń Qyrǵyzstanda ustalýyna qatysty mán-jaiy belgili boldy, - dep habarlaidy Tengrinews.kz saity 24.kg agenttigine silteme jasap.
Bishkek MUQK málimetinshe, 2023 jylǵy 30 jeltoqsanda Bishkekte Qazaqstan Respýblikasy Qylmystyq kodeksiniń 217-baby ("Qarjylyq (investitsiialyq) piramidany qurý jáne oǵan basshylyq etý") boiynsha aiyptalýshy 1985 jyly týǵan sheteldik azamat O.A. ustaldy. Syrttai bultartpaý sharasy – qamaýǵa alý tańdaldy.
"Ustalǵan azamat Qyrǵyz Respýblikasynyń 2000 jyly qaitys bolǵan azamatynyń tólqujatyn zańsyz alyp, birneshe ret paidalanǵany anyqtaldy", - delingen habarlamada.
Kúdikti Qazaqstannyń quqyq qorǵaý organdarynan jasyrynyp, Qyrǵyzstannyń memlekettik shekarasyn kesip ótken, al tirkeý organynyń laýazymdy adamdary ony respýblikada odan ári zańdastyrýǵa járdem kórsetken.
"Sonymen qatar ol esirtki zattaryn saqtaǵany úshin qylmystyq jaýapkershilikke tartylyp, 150 myń som aiyppul salyndy", - dedi MUQK baspasóz qyzmeti.
Qazirgi ýaqytta Qyrǵyzstan Respýblikasy Qylmystyq kodeksiniń 347-baby ("Zańsyz tólqujat berý") boiynsha qylmystyq is qozǵalǵan.
Pasportty zańsyz berdi degen kúdik boiynsha 1981 jyly týǵan Q.A. halyqty tirkeý departamenti Bishkek Oktiabr aýdanynyń pasporttyq-vizalyq jáne tirkeý jumysy bóliminiń jetekshi mamany ustalyp, Bishkek MUQK ÁÁK-ne qamaýǵa alynǵan.
Aita keteiik, 2023 jylǵy 23 maýsymda Almaly aýdandyq soty tanymal vainerler Meiirjan Tórebaev pen Meiirhan Sherniiazovqa Mudarabah Capital qarjy piramidasy týraly is boiynsha úkim shyǵardy.
Tórebaev pen Sherniiazov Qylmystyq kodekstiń 217-baby "qarjy (investitsiialyq) piramidasyn qurý jáne basqarý" boiynsha kináli dep tanyldy.
Sonymen qatar Almaly aýdanynyń soty vainer Meiirjan Tórebaevqa qaýipsizdigi eń tómen koloniiada bes jylǵa bas bostandyǵynan aiyrý jazasyn taǵaiyndady. Meiirhan Sherniiazovqa da dál osyndai jaza berildi. Qalǵan qatysýshylarǵa 8 jyldan 14 jylǵa deiin bas bostandyǵynan aiyrý jazasy taǵaiyndaldy.
Sondai-aq sot jábirlenýshilerdiń 1 milliard 861 million 752 myń 441 teńgeden asa somadaǵy talabyn qanaǵattandyrdy.
