Politseiler qarjy piramidasy isine qatysy bar Qazaqstannan qashyp ketken taǵy bir adamdy ustady, dep habarlaidy "Ult aqparat" Polisia.kz saityna silteme jasap.
16 maýsymda Qazaqstan politsiiasynyń suratýy boiynsha Máskeýde 29 jastaǵy S.Frolov ustalyp, tergeý izoliatoryna qamaldy. Kúdikti Frolovqa «Garant-24», «Vygodnyi zaim» jáne «Estate Lombard» qarjy piramidasy isi boiynsha salymshylardyń aqshalai qarajatyn jymqyrǵany úshin halyqaralyq izdeý jariialandy.
«Budan buryn Nur-Sultan qalalyq soty oǵan qatysty qamaýǵa alý túrindegi bultartpaý sharasyn syrttai taǵaiyndady. Qazaqstan men Resei politseileriniń ózara árekettesýiniń arqasynda S. Frolov elimizge ekstraditsiialanyp, sot aldynda jaýap beredi», - dep habarlady IIM Tergeý departamentiniń bastyǵy Sanjar Ádilov.
Qylmystyq isti Aqtóbe qalasynda IIM arnaiy tergeý-jedel toby tergep jatyr.
«Qazirgi ýaqytta osy is boiynsha 15 myń zardap shegýshi anyqtaldy, zalal somasy 20 mlrd teńgeden asty», - dedi Ádilov.
Eske salaiyq, 22 aqpanda Shyǵys Qazaqstan, Qaraǵandy, Taraz, Aqtaý qalalarynda lombard direktorlarynyń ustalǵany týraly habarlandy.
Pavlodarda da «Estate Lombard» JShS jáne «Garant 24» JShS óńirlik lombardtardyń direktorlary qamaýǵa alyndy.
«Garant-24» qarjy piramidalar isi boiynsha 12 adamǵa halyqaralyq izdeý jariialandy. Istiń basty figýranty A.Myrzabekov Moldovadan ekstraditsiialandy. Ol «Garant 24 Lombard» JShS-nyń quryltaishysy jáne «ESTATE Lombard», «Vygodnyi zaim» uiymdarynyń da qylmystyq áreketterine basshylyq jasaǵan.
