Qarjy naryǵyn retteý jáne damytý agenttigi Jýsan bank ATF bank aktsiiasynyń 99,76 paiyzyn satyp alýyna qatysty túsinikteme berdi, dep habarlaidy "Ult aqparat" agenttiktiń Syrtqy kommýnikatsiialar basqarmasyna silteme jasap.
«Agenttik bankter arasynda qol jetkizilgen kelisimdi qoldaidy jáne bankterdiń biznes-modelderiniń birigýi bank sektorynyń turaqtylyǵyna jáne eki banktiń qarjylyq jáne tehnologiialyq basymdyqtaryn paidalaný esebinen halyqqa kórsetiletin qyzmetterdiń sapasyn jaqsartýǵa yqpal etetin bolady dep esepteidi.
Jýsan bank jáne ATF banktiń aǵymdaǵy qyzmeti, sondai-aq bankterdiń klientteri úshin kórsetiletin qyzmetterdiń qoljetimdiligi ýaqtyly jáne tolyq kólemde júzege asyrylady.
Kelisimdi iske asyrý úshin bankter depozitorlardyń, kreditorlardyń jáne bankterdiń ózge de klientteriniń quqyqtary men zańdy múddeleriniń saqtalýyn eskere otyryp, iri aktsionerlerdi aýystyrýǵa agenttiktiń kelisimin alýǵa tiis», delingen habarlamada.
Agenttik Ulttyq bankpen birlesip aǵymdaǵy jyly ekinshi deńgeidegi bankter aktivteriniń sapasyna táýelsiz baǵalaýdy (AQR) jáne 14 bankke tolyq aýqymdy qadaǵalaý stress testileýdi ótkizdi.
«AQR jáne qadaǵalap stresstestileý qorytyndysy boiynsha barlyq bankke úzdik halyqaralyq praktikaǵa sáikes biznes modelderdi jetildirý, anyqtalǵan kemshilikterdi joiý jáne strestik aktivtermen jumys isteý tiimdiligin arttyrý boiynsha sharalar qabyldaý tapsyryldy.
Eki bankti biriktirý týraly sheshim AQR nátijesi boiynsha agenttik júrgizgen jumystyń nátijesi bolyp tabylady jáne bank sektorynyń qarjylyq ornyqtylyǵyn jáne básekege qabilettiligin arttyrýǵa yqpal etedi», delingen habarlamada.
Agenttiktiń málimdeýinshe, qosýdyń jáne biriktirýdiń talaptary men jalpyǵa belgili praktikasyna sáikes qol jetkizilgen kelisimniń nátijesi boiynsha investor biriktirýdiń sońǵy ólshemderin anyqtaý úshin keshendi tekserý (due diligence) júrgizedi.
«Aldyn ala kelisý talaptary qosý men biriktirýdiń klassikalyq modeline (M&A) sáikes keledi, oǵan sáikes táýekelder ATF banktiń aǵymdaǵy menshikti kapitaly esebinen óteletin bolady.
Tutastai alǵanda, bankterdi biriktirýdiń bul modeli ATF banktiń qajetti qosymsha proviziialar qurý jónindegi aǵymdaǵy mindettemelerin retteýdi, ony keiinnen Jýsan banktiń satyp alýyn jáne retteýshiniń talaptaryna sáikes táýekelderdi óteý úshin kapitaldyń jetkilikti deńgeiin qalyptastyrýdy kózdeidi», delingen habarlamada.
Eske sala ketsek, 2 qarashada Jýsan Bank pen ATF bank aktsioneri Ǵ.Esenov Jýsan Bank-tiń ATF bank aktsiiasynyń 99,76 paiyzyn satyp alýy týraly aldyn ala kelisimge qol jetkizgeni habarlandy.
