QR Qarjy naryǵyn retteý jáne damytý agenttigi investitsiialyq qyzmetpen bailanysty alaiaqtyq jaǵdailardyń jiilep ketýine orai, azamattardy qyraǵy bolýǵa jáne alaiaqtardyń arbaýyna túsip qalmaýǵa shaqyrdy, dep habarlaidy QazAqparat.
Agenttiktiń baspasóz qyzmetinde málimdegendei, qazaqstandyqtar ózderin Qazaqstanda jáne odan tysqary jerlerde jumys isteitin qarjy uiymdarynyń qyzmetkerleri retinde tanystyratyn alaiaqtarǵa tap bolýda.
Alaiaqtardyń kópshiligi WhatsApp, Telegram, áleýmettik jeliler, elektrondyq poshta arqyly áreket etedi, «sýyq» qońyraýlar paidalanady. Bul rette qylmyskerler ózderin investitsiialyq kompaniialardyń qyzmetkerleri retinde tanystyryp, baǵaly qaǵazdarǵa aqsha salýdy usynady.
Alaiaqtar áleýetti qurbanyna joǵary investitsiialyq kiris, konsýltatsiialar alýǵa, ilespe qyzmetter kórsetýge ýáde etedi, ol úshin jalǵan brokerlik shottarǵa túrli soma aýdarýdy ótinedi.
Aqsha aýdarylǵan soń, alaiaqtar klient óz qarajatyn ishinara nemese tolyǵymen alǵysy kelgen sátke deiin onymen yntymaqtasa jumys isteidi.
Odan soń ádette «salymshylardyń» jalǵan brokerlermen qarym-qatynas ornatýynda qiyndyqtar týyndai bastaidy, tipti kóptegen jaǵdailarda alaiaqtar aldyńǵy salynǵan qarajatty tolyq alý úshin qosymsha soma salýdy talap etedi.
Agenttik retteýshiniń litsenziiasy joq kompaniialarmen sharttar jasasyp, ózara is-qimyl jasaý kezinde klientter barlyq bolýy múmkin táýekeldi ózderi qabyldaitynyn atap ótedi.
Osyǵan orai, jeke múlkin saqtaý úshin agenttik qazaqstandyqtarǵa mynadai qarapaiym erejelerdi basshylyqqa alýǵa keńes beredi:
1. Qazaqstan aýmaǵynda brokerlik qyzmetti jáne investitsiialyq portfeldi basqarý qyzmetin litsenziiasy bar sýbektiler ǵana júzege asyra alady. Kompaniiada litsenziianyń bolýyn Qarjy naryǵyn retteý jáne damytý agenttiginiń resmi saitynan tekserýge bolady.
2. Sonymen birge ókilder silteme jasaityn saitqa nemese investitsiialyq kompaniianyń qosymshasyna kirip, barlyq ornalastyrylǵan aqparatty, onyń ishinde qarjylyq eseptilikti, ýákiletti organnyń litsenziiasyn, úlgilik shartty, sondai-aq, basqa da ilespe qujattar men aqparatty muqiiat zerdeleý qajet. Qajet bolǵan jaǵdaida, ózara is-áreket yqtimal alaiaqpen emes, kásibi qatysýshymen júzege asyrylatynyna kóz jetkizý úshin resmi resýrsta kórsetilgen bailanys derektemelerine qońyraý shalý kerek.
3. Jarnamaǵa árdaiym saqtyqpen qaraý qajet: BAQ-taǵy, internet-resýrstardaǵy, onyń ishinde áleýmettik jelilerdegi joǵary kiristilikke ýáde etken, shamadan tys jarnama kóbine alaiaqtyq bolyp tabylady. Baǵaly qaǵazdar naryǵyndaǵy litsenziialanǵan kásibi qatysýshylarǵa joǵary kiristilikke ne investitsiialaýdan shyǵyn bolmaitynyna kepildik berýge tyiym salynady.
4. Árqashan derekterdi qaita tekserińiz, áli kórsetilmegen qyzmet nemese alynbaǵan taýar úshin tólem jasamańyz, belgisiz shottar men telefon nómirlerine aqsha aýdarmańyz, internet jelisindegi kúdikti siltemelerge ótpeńiz jáne banktik kartalaryńyzdyń derekterin habarlamańyz.
«Osyndai kompaniialardyń is-áreketine aryz-shaǵymdardyń jiilep ketkenin eskere otyryp, olar týraly aqparat quqyq qorǵaý organdarynyń nazaryna jedel jetkiziledi. Budan basqa, agenttik Qazaqstan aýmaǵynda osyndai kompaniialardyń saittaryn buǵattaý múmkindigi týraly Aqparat jáne qoǵamdyq damý ministrligine hat jiberip otyrady. Qarapaiym erejelerdi saqtaý qarjylyq shyǵyndardy, negizsiz táýekelderdi, sondai-aq, jeke aqparat jariia bolmaidy», - dedi Agenttiktiń baspasóz qyzmetinde.
