Foto: Soltan Jeksenbekov/ Kazinform
Búginde 854 blogerge 72 mlrd teńge tabys salyǵyn tóleý jóninde habarlama jiberildi. Bul týraly Qarjy ministri Mádi Takiev málim etti, – dep habarlaidy Ult.kz Kazinform-ǵa silteme jasap.
– Blogerler 2026 jylǵy 31 naýryzǵa deiin deklaratsiia tapsyrýy kerek, iaǵni tabysyn rastaidy. Jalpy bilesizder, biz blogerlermen birtalai jumys atqardyq. Myńdaǵan blogerge salyq tólemi týraly habarlama jiberildi, – dedi Mádi Takiev Májilistiń jalpy otyrysynan keiin ótken brifingide.
Ministr keltirgen málimetke súiensek, 854 blogerge 72 mlrd teńge tabys salyǵyn tóleý jóninde habarlama jiberildi. Onyń ishinde 394 bloger 11,8 mlrd teńge salyq tóledi.
– Qalǵan 438 blogerge qatysty tekserý júrgizemiz, – dep tolyqtyrdy vedomstvo basshysy.
Buǵan deiin habarlaǵanymyzdai, 360-qa jýyq bloger óz erkimen 10,5 mlrd teńge somasyndaǵy tabysyn rastady. Tólem 256 mln teńge (salyq) boldy.
Eske salaiyq, jyl basynda Memlekettik kirister komiteti tabysyn 53,3 mlrd teńgege jasyrǵan blogerler anyqtady.
