Foto: Akorda.kz
Prezident Premer-Ministrdiń orynbasary – Qarjy ministri Erulan Jamaýbaevty qabyldady, dep habarlaidy "Ult aqparat" Aqordanyń resmi saityna silteme jasap.
Memleket basshysyna elimizdiń byltyrǵy áleýmettik-ekonomikalyq damýynyń qorytyndylary jáne Úkimettiń qarjy-ekonomikalyq blogynyń aldaǵy jumysynyń negizgi baǵyttary týraly baiandaldy.
Erulan Jamaýbaevtyń aitýynsha, jalpy ishki ónimniń ósimi 3,1 paiyzǵa jetip, investitsiia kólemi 7,8 paiyzǵa artqan. Ekonomikanyń barlyq salasy damyp keledi. Atap aitqanda, óńdeý ónerkásibindegi óndiris deńgeii 3,4 paiyzǵa, qurylys kólemi 9,4 paiyzǵa, aýyl sharýashylyǵy óniminiń kórsetkishi 9,1 paiyzǵa ósti.
2022 jyldyń 11 aiynda syrtqy saýda ainalymy 33,4 paiyzǵa óskeni atap ótildi. Saýda balansy aitarlyqtai nyǵaiyp keledi. Bul rette óńdelgen taýarlar eksporty 33,8 paiyzǵa ósip, 24,1 milliard dollarǵa jetti.
Memleket basshysyna berilgen málimetterge sáikes, respýblikalyq biýdjettiń kirisi jónindegi jospar 309 milliard teńgege asyra oryndalǵan.
Prezidentke Biýdjet jáne Salyq jańa kodeksteriniń ázirlený barysy, «Ulttyq qor – balalarǵa» jobasynyń jumys mehanizmderi, zańsyz ielengen jáne elden shyǵarylǵan aktivterdi memleketke qaitarý úshin qabyldanyp jatqan sharalar týraly aqparat berildi.
Memleket basshysynyń tapsyrmasyna sáikes, sybailas jemqorlyqqa qatysty qylmystyq ister boiynsha tárkilengen qarajat «Bilim berý infraqurylymyn qoldaý qoryna» jiberilip jatyr. Qazirgi kezde arnaiy shotta jinalǵan 120 milliard teńgege jýyq qarajat mektepterdiń qurylysy men jóndeý jumystaryna jumsalady.
Sonymen qatar Erulan Jamaýbaev jeke tulǵalardyń bankrottyǵy týraly Zańnyń júzege asyrylýy týraly aitty.
Kezdesý sońynda Qasym-Jomart Toqaev biýdjet qarajatyn tiimdi paidalanýǵa, memleket qarjysynyń jaǵdaiyn jaqsartýǵa, sondai-aq salyqtyq jáne kedendik ákimshilendirý isin jetildirýge baǵyttalǵan birqatar tapsyrma berdi.
