Qarjy ministri Erulan Jamaýbaev Qazaqstan men Qytaidyń kedendik málimetteriniń aiyrmashylyǵyna qatysty pikir bildirdi, dep habarlaidy QazAqparat.
«Bul – biz úshin mańyzdy másele. Keden beketterindegi búkil aqparat joldanatyn sitýatsiialyq ortalyqty da quryp qoidyq. Oǵan turaqty túrde monitoring júrgiziledi. Táýekelderdi basqarý júiesin jetildirip, deklaratsiialanatyn taýarlardyń baǵasyn baqylaý maqsatynda 6 myń baǵalyq indikatorlardy engizdik», - dedi Erulan Jamaýbaev halyq aldynda esep berýden keiin OKQ-da uiymdastyrylǵan baspasóz máslihatynda.
Qarjy ministri aiyrmashylyq anyqtalǵan jaǵdaida kásipkerler qosymsha kedendik bajdy tóleitinin málim etti.
«Sonymen qatar, qytai tarapymen eksporttyq-importtyq operatsiialar boiynsha aqparattardy almasý formaty týraly kelisimge keldik. Ázirge bul málimetterdiń rastyǵyn áli de anyqtaý kerek. Alaida ózara almasqan aqparattardyń sapasyn jaqsartý úshin jumys aiasyn keńeitemiz. Sonymen birge, Qyrǵyz Respýblikasymen jáne Qytaimen shekaradaǵy ótkizý beketterin barynsha jańǵyrtamyz. Tolyqqandy tsifrlandyrý shynaiy aqparatty alý úshin aitarlyqtai kómek bolary sózsiz», - dedi ol.
Qarjy ministri qolǵa alynǵan sharalardyń arqasynda ótken jyly QHR-men kedendik statistikadaǵy aiyrmashylyq 53-ten 48 paiyzǵa azaiǵanyn málim etti.
