Qarjy ministri Álihan Smaiylov Qazaqstan Prezidentiniń Joldaýynda aitylǵan mindetterdi oryndaý úshin qansha qarajat bólinetinin aitty, dep habarlaidy QazAqparat tilshisi.
Qarjy ministriniń aitýynsha, aldaǵy úsh jylda Prezidenttiń Joldaýyndaǵy mindetterdi oryndaýǵa 1 trln 288 mlrd teńge qarastyrylǵan.
«Naqtyraq aitqanda, eń tómengi ailyq jalaqyny kóterý úshin 85,8 mlrd teńge bólinedi. Tiisinshe, bul qarajat 275 myń qyzmetkerdiń ailyǵyn ósirýge baǵyttalady. Óńdeý ónerkásibi men eksportty ilgerletý úshin 500 mlrd teńge bólinedi. Ol qarajattyń 322 mlrd teńgesi - Ulttyq qor men Respýblikalyq biýdjetten buryn bólinip, qaita paidalanylyp jatqan qarajat. Shaǵyn jáne orta biznesti damytý úshin úsh jyldyń ishinde 90 mlrd (iaǵni, jylyna 30 mlrd teńge) bólý qarastyrylǵan», - deidi ministr búgingi Úkimettiń baspasóz ortalyǵynda ótken jiynda.
Álihan Smaiylovtyń aitýynsha, agroónerkásip keshenin damytý úshin úsh jyldyń ishinde 300 mlrd teńge (jylyna 100 mlrd teńge) bólinbek. Sonymen qatar, aldaǵy 5 jylda «Nurly jer» baǵdarlamasy aiasynda 2 mln adamdy úimen qamtý úshin 76,6 mln sh.m. baspana salý kózdelgen.
«Qosymsha jalǵa beriletin úilerdiń qurylysyna 30 mlrd teńge bólinetin bolady. Bul 250 myń otbasynyń turǵyn úi máselesin sheshýge múmkindik beredi. Bilim nysandaryn salý úshin úsh jylda 50 mlrd teńge bólý kózdelgen. Balalardyń qaýipsizdigin qamtamasyz etý úshin, sonymen qatar mekteptegi psihologtardyń jumysyn kúsheitýge 16,8 mlrd teńge qarastyrylady (jylyna 5,6 mlrd teńge)», - deidi Álihan Smaiylov.
Eske sala ketsek, osy jyldyń 5 qazanynda Qazaqstan Resýpblikasynyń Prezidenti Nursultan Nazarbaev Qazaqstan halqyna «Qazaqstandyqtardyń ál-aýqatynyń ósýi: Tabys pen turmys sapasyn arttyrý» Joldaýyn jariialaǵan bolatyn.
