قارجى مينيسترٸ ەليحان سمايىلوۆ قازاقستان پرەزيدەنتٸنٸڭ جولداۋىندا ايتىلعان مٸندەتتەردٸ ورىنداۋ ٷشٸن قانشا قاراجات بٶلٸنەتٸنٸن ايتتى, دەپ حابارلايدى قازاقپارات تٸلشٸسٸ.
قارجى مينيسترٸنٸڭ ايتۋىنشا, الداعى ٷش جىلدا پرەزيدەنتتٸڭ جولداۋىنداعى مٸندەتتەردٸ ورىنداۋعا 1 ترلن 288 ملرد تەڭگە قاراستىرىلعان.
«ناقتىراق ايتقاندا, ەڭ تٶمەنگٸ ايلىق جالاقىنى كٶتەرۋ ٷشٸن 85,8 ملرد تەڭگە بٶلٸنەدٸ. تيٸسٸنشە, بۇل قاراجات 275 مىڭ قىزمەتكەردٸڭ ايلىعىن ٶسٸرۋگە باعىتتالادى. ٶڭدەۋ ٶنەركەسٸبٸ مەن ەكسپورتتى ٸلگەرلەتۋ ٷشٸن 500 ملرد تەڭگە بٶلٸنەدٸ. ول قاراجاتتىڭ 322 ملرد تەڭگەسٸ - ۇلتتىق قور مەن رەسپۋبليكالىق بيۋدجەتتەن بۇرىن بٶلٸنٸپ, قايتا پايدالانىلىپ جاتقان قاراجات. شاعىن جەنە ورتا بيزنەستٸ دامىتۋ ٷشٸن ٷش جىلدىڭ ٸشٸندە 90 ملرد (ياعني, جىلىنا 30 ملرد تەڭگە) بٶلۋ قاراستىرىلعان», - دەيدٸ مينيستر بٷگٸنگٸ ٷكٸمەتتٸڭ باسپاسٶز ورتالىعىندا ٶتكەن جيىندا.
ەليحان سمايىلوۆتىڭ ايتۋىنشا, اگروٶنەركەسٸپ كەشەنٸن دامىتۋ ٷشٸن ٷش جىلدىڭ ٸشٸندە 300 ملرد تەڭگە (جىلىنا 100 ملرد تەڭگە) بٶلٸنبەك. سونىمەن قاتار, الداعى 5 جىلدا «نۇرلى جەر» باعدارلاماسى اياسىندا 2 ملن ادامدى ٷيمەن قامتۋ ٷشٸن 76,6 ملن ش.م. باسپانا سالۋ كٶزدەلگەن.
«قوسىمشا جالعا بەرٸلەتٸن ٷيلەردٸڭ قۇرىلىسىنا 30 ملرد تەڭگە بٶلٸنەتٸن بولادى. بۇل 250 مىڭ وتباسىنىڭ تۇرعىن ٷي مەسەلەسٸن شەشۋگە مٷمكٸندٸك بەرەدٸ. بٸلٸم نىساندارىن سالۋ ٷشٸن ٷش جىلدا 50 ملرد تەڭگە بٶلۋ كٶزدەلگەن. بالالاردىڭ قاۋٸپسٸزدٸگٸن قامتاماسىز ەتۋ ٷشٸن, سونىمەن قاتار مەكتەپتەگٸ پسيحولوگتاردىڭ جۇمىسىن كٷشەيتۋگە 16,8 ملرد تەڭگە قاراستىرىلادى (جىلىنا 5,6 ملرد تەڭگە)», - دەيدٸ ەليحان سمايىلوۆ.
ەسكە سالا كەتسەك, وسى جىلدىڭ 5 قازانىندا قازاقستان رەسۋپبليكاسىنىڭ پرەزيدەنتٸ نۇرسۇلتان نازارباەۆ قازاقستان حالقىنا «قازاقستاندىقتاردىڭ ەل-اۋقاتىنىڭ ٶسۋٸ: تابىس پەن تۇرمىس ساپاسىن ارتتىرۋ» جولداۋىن جارييالاعان بولاتىن.
