Buǵan deiin Qarjy ministrliginiń biznesti tekserýge qoiylǵan moratoriidi alyp tastaý týraly usynysyn birqatar depýtattar synǵa aldy. Vedomstvo depýtattardyń synyna qalai qaraidy? Úkimet úiinde ótken brifingide Qarjy ministri Erulan Jamaýbaevqa osyndai saýal qoiyldy, dep habarlaidy QazAqparat.
«Qarjy ministrligi kez kelgen konstrýktivti syndy qalypty qabyldaidy. Biz arqashan dialogqa daiynbyz. Biraq bul jerde moratoriidi alyp tastaý týraly sóz joq. Moratorii Prezident Jarlyǵy boiynsha 2023 jyldyń 1 qańtaryna deiin saqtalady. Qarjy ministrligi josyqsyz kásipkerlerdi jaýapqa tartý bóliginde ǵana máseles kótergen bolatyn. Birneshe mysal keltireiin: ótken jyly saýda operatsiialary kezinde túbirtek berilmegeni týraly 19 myńnan astam shaǵym tústi. Taǵy bir mysal: biz júiede onlain baqylaý-kassalyq mashinalaryn qoldanatyn kásipkerlerdiń 50 paiyzy udaiy túbirtek bermeitinin kórip otyrmyz», - dedi Qarjy ministri.
Onyń aitýynsha, Memlekettik kirister komitetinde mundai zańsyzdyqtarǵa áreket etý mehanizmi joq.
«Osyǵan bailanysty biz qazir túbirtek bermeitin josyqsyz salyq tóleýshilerge qatysty salyqtyq baqylaý algoritmin pysyqtap jatyrmyz. Moratorii Prezidenttiń Jarlyǵy boiynsha jalǵasatynyn atap óttim. Túbirtek bermeitin josyqsyz kásipkerlerge qatysty biz salyqtyq jaýap berý sharalaryn ázirleimiz. Tiisti sharalardy biz biznes qaýymdastyqtarǵa usynyp, olarmen talqylaimyz. Biz biznesti retteýge qatysy bar kez kelgen sheshimimizdi qoǵamdyq tyńdaýǵa shyǵaryp, talqylaimyz. Bul másele boiynsha da mindetti túrde qoǵamdyq tyńdaý ótedi. Depýtattar korpýsymen de osy baǵytta jumys isteimiz», - dedi ministr.
