Respýblikalyq biýdjet boiynsha 40 mlrd teńge igerilmei qaldy. Bul týraly QR Qarjy ministri Erulan Jamaýbaev aitty, dep habarlaidy QazAqparat.
«Memlekettik biýdjet shyǵystary 98,7%-ke, respýblikalyq biýdjet shyǵystary – 99,6%-ke, jergilikti biýdjetterdiń shyǵystary 98%-ke atqaryldy. Respýblikalyq biýdjet boiynsha shyǵystar 12 trln teńgeni qurady. Munda 50 mlrd teńge jumsalmady, onyń ishinde 10 mlrd teńge únemdelgen jáne 40 mlrd teńge igerilmei qalǵan», - dedi Qarjy ministri Úkimet otyrysynda.
Onyń aitýynsha, igerilmeýdiń anaǵurlym iri somalary tótenshe jaǵdailar, tsifrlyq damý, innovatsiialar jáne aeroǵarysh ónerkásibi, densaýlyq saqtaý, ishki ister jáne qarjy ministrlikterinde baiqalǵan.
Igerilmeýdiń negizgi sebepteri: tólem naqty kórsetilgen qyzmet kólemi boiynsha júrgizilgen, shot-faktýralar, oryndalǵan jumys aktileri ýaqytyly usynylmaǵan, qazynashylyq organdaryna tólem shottary kesh usynylǵan jáne konkýrstyq rásimder uzaq ótkizilgen.
«Jergilikti biýdjetterdiń shyǵystary 6,7 trln teńgeni qurady, onda 134 mlrd teńgege atqarylmaǵan. Biyl óńirlerge 2,5 trln teńge somasynda nysanaly transfertter kózdelgen. 1 qarashaǵa olarǵa 1 trln 813 mlrd teńge bólingen. Onyń 96,6%-i igerildi. 62 mlrd teńge atqarylmady, onyń ishinde 6 mlrd teńge únemdelip, 56 mlrd teńgesi igerilmei qalǵan. Eń kóp igerilmeý Almaty qalasynda, Soltústik Qazaqstan, Batys Qazaqstan, Almaty jáne Túrkistan oblystarynda tirkelgen», - dedi Jamaýbaev.
