Sot úkimi Pavlodar oblysynyń qylmystyq ister jónindegi mamandandyrylǵan aýdanaralyq sotynda jariialandy, dep habarlaidy Pavlodarnews.kz.
Is alqabilerdiń qatysýymen qaraldy. Sot 28 jastaǵy pavlodarlyqty qylmysqa daiyndalǵany jáne kisi óltirýge oqtalǵany úshin kináli dep tapty.
Oqiǵa ótken jyldyń sáýir aiynda kópqabatty úidiń aýlasynda bolǵan.
Oblys ortalyǵynyń 27 jastaǵy turǵyny dosyna úlken somada aqsha bergen, biraq ol qaryzdy ýaqytynda qaitarmaǵan.
Er adamdar ózara kelise almaǵan. Nesie berýshi ańshy myltyǵymen qarýlanyp, jábirlenýshi turǵan Buqar Jyraý kóshesine barǵan. Sottalýshy boryshkerdi kireberisten kórip, eki ret oq atqan. Birinshi oq kireberistiń metall esigine, ekinshisi úidiń qabyrǵasyna tigen. Qoryqqan boryshker kireberiske júgirgen, nesie berýshi jábirlenýshini qýyp jete almaǵan.
Buǵan deiin is Pavlodar oblysynyń qylmystyq ister jónindegi mamandandyrylǵan aýdanaralyq sotynda qaralǵan bolatyn. Sol kezde sottalýshy óltirýge tyryspaǵanyn, jai ǵana qorqytqysy kelgenin aitqan. Jábirlenýshi quqyq buzýshyny keshirip, er adam sot zalynda qamaýdan bosatyldy. Alaida prokýror apelliatsiialyq ótinish berdi. Úkimniń kúshi joiylyp, is basqa alqabilermen jańa sot talqylaýyna jiberildi.
Búgin qastandyq týraly 10 alqabi men bir sýdia qarady, olardyń árqaisysy bir daýysqa ie boldy. Kópshilik daýyspen er adam kisi óltirýge oqtalǵany úshin kináli dep tanyldy. Sot oǵan segiz jylǵa bas bostandyǵynan aiyrý túrinde jaza taǵaiyndady.
- Jazasyn óteý qaýipsizdigi barynsha joǵary qylmystyq-atqarý júiesi mekemesinde taǵaiyndaldy. Eshqaida ketpeý týraly qolhat túrindegi bultartpaý sharasy ózgertilip, sottalǵan azamat sot zalynda qamaýǵa alyndy, - dep málimdedi oblystyq sottyń sýdiasy Nurlan Aitbaev.
Sot pavlodarlyq sottalýshynyń sottylyǵynyń joqtyǵyn, kinásin moiyndaýyn, ókinýin, asyraýynda kishkentai balanyń bolýyn, múgedektigin eskerdi. Degenmen tótenshe jaǵdai kezinde qarý qoldaný jáne qylmys jasaý kináni aýyrlatatyn oqiǵa boldy.
Úkim áli zańdy kúshine engen joq.
