Qarýyn óz erkimen tapsyrǵan 650 adamǵa 54 mln teńge syiaqy berildi. Bul týraly QR IIM Ákimshilik politsiia komitetiniń bólim bastyǵy Asylbek Ydyrysov aitty, dep habarlaidy QazAqparat.
Onyń aitýynsha, zańsyz saqtalǵan qarýdy óz erkimen tapsyrǵan azamatqa tólem mólsheri qarýdyń túrine, tehnikalyq jaǵdaiyna bailanysty jáne ár birligi úshin 30 myńnan 300 myńǵa deiin bolady. Syiaqy kólemin ár oblystyq, qalalyq jáne aýdandyq politsiia organdarynda qurylatyn komissiia anyqtaidy. Mysaly, 100 ailyq eseptik kórsetkishke deiin nemese 290 myń teńgeni azamat avtomatty oiyq qarýdyń árbir tapsyrǵan birligi úshin ala alady.
«Mundai somanyń jartysy nemese 145 myńy oiyq uńǵyly myltyqtar men karabinder úshin tólenýi múmkin. Tapanshalar men revolverler úshin 100 myń teńgege deiingi mólsherde tólem boljanady. Tegis uńǵyly myltyqtardyń árbir birligi 90 myń teńgege deiin baǵalanýy yqtimal», - dedi bólim bastyǵy.
Asylbek Ydyrysovtyń atap ótýinshe, Ishki ister ministrliginiń aqparattyq júiesine tirkelgen atys qarýyna, qoldan jasalǵan oq-dárige, gaz jáne travmatikalyq tapanshaǵa syiaqy tóleý qarastyrylmaǵan.
Aita keteiik, 14 mamyr men 17 maýsym aralyǵynda elimizdiń aýmaǵynda «Qarý» keń aýqymdy jedel aldyn alý is-sharasy ótkizilip jatyr.
