QR Qorǵanys ministrliginde jemqorlyqqa qarsy zańnamanyń oryndalýyn baqylaý komissiiasynyń keńeitilgen otyrysy ótti, dep habarlaidy "Ult aqparat".
«Qorǵanys ministri general-maior N.Ermekbaevtyń tóraǵalyǵymen ótken keńeitilgen otyrysqa QR Sybailas jemqorlyqqa qarsy is-qimyl agenttigi tóraǵasynyń birinshi orynbasary O.Bektenov pen QR QK Bas shtaby jáne QM qurylymdyq bólimsheleri basshylary qatysty. Keńeitilgen otyrysta QM orynbasary general-maior T.Dándibaev komissiianyń jańa tóraǵasy retinde tanystyryldy. Otyrysta QK sybailas jemqorlyqty azaitý men aldyn alý sharalaryn odan ári jetildirýdiń jańa ádisteri usynylyp, komissiia qyzmeti qorytyndylandy. Áskeri qyzmetshilerdiń qaýipsizdigin qamtamasyz etý jáne sybailas jemqorlyqtan qorǵaýdy qamtamasyz etý úshin júieli sharalar jariialandy. Olar jaqyn arada qabyldanatyn bolady», - delingen atalǵan ministrlik baspasóz qyzmeti taratqan aqparatta.
Vedomstvo málimetinshe, osydan biraz ýaqyt buryn ministrdiń sheshimimen áskeri politsiia bas basqarmasynyń sybailas jemqorlyqqa qarsy is-qimyl jónindegi basqarmasyna ishki qaýipsizdik ókilettikteri men fýnktsiialaryn berý sheshimi qabyldanǵan. Budan bólek, sybailas jemqorlyq quqyq buzýshylyq faktisi týraly habarlaǵan nemese áskeri ortada sybailas jemqorlyqtyń aldyn alýǵa ózge de túrde járdemdesetin adamdardy kótermeleý júiesin belsendi paidalaný usynyldy.
«Qarýly Kúshter qatarynda bolyp jatqan sybailas jemqorlyq faktilerine eshkim tózbek emes. Biz únsiz qalmaýymyz kerek. Áskerdi osyndai áleýmettik zulymdyqtan tazartý sharalaryn qoldanýymyz qajet. Laýazymdy tulǵalar úshin «jemqorlyq» sózi tózbeýshilik pen sybailas jemqorlyqqa qarsy turaqtylyq sezimin týdyrýy tiis. Qarýly Kúshter – memleket turaqtylyǵynyń negizi. Sondyqtan bizdiń qatarymyzda sybailas jemqorlyqty azaitý mańyzdy», - dep atap ótti Qorǵanys ministri.
Sonymen qatar, otyrys barysynda Memleket basshysynyń Joldaýyn júzege asyrý aiasynda áskeri qyzmetshilerdiń sybailas jemqorlyqqa qarsy mádenietin qalyptastyrý jáne azamattardyń senimin arttyrý úshin «Qarýly Kúshter - Adaldyq alańy» jobalyq keńsesi, jeke jáne zańdy tulǵalardyń kedergisiz qol jetkizý terezesi ashyldy. Onda barlyq niet bildirýshiler 442570, 442571, 442575, 474937 senim telefondary arqyly sybailas jemqorlyqtyń kez kelgen faktileri týraly habarlai alady.
Otyrys qorytyndysy boiynsha barlyq dárejedegi jáne deńgeidegi komandirlerge áskeri ortadaǵy sybailas jemqorlyqty joiý boiynsha jumysty jandandyrý tapsyryldy. Sybailas jemqorlyqty joiýda árbir áskeri qyzmetshiniń jeke jaýapkershiligi men tártibi mańyzdy ról atqarýy tiis. Ol úshin QR QK-diń júiesinde sybailas jemqorlyqqa qarsy standarttar, ádep normalary, sondai-aq sybailas jemqorlyq táýekeli joǵary laýazymǵa taǵaiyndaý kezinde kandidatýralardy qarastyratyn attestattaý komissiialarynyń qyzmeti qolǵa alynady.
