Elimizde pnevmatikalyq jáne signaldyq qarý, gaz ballonyn satyp alýdyń jańa erejesi kúshine endi, dep habarlaidy QazAqparat.
«Endi azamattar qarý satyp alý úshin ony satatyn dúkende kámelettik jasqa tolǵanyn dáleldeý qajet. Sondai-aq, sottalmaǵany týraly jáne meditsinalyq anyqtamalar usynyp, qarý ustaýdyń qaýipsizdik erejelerin biletindigin dáleldeýi kerek», - dedi QR Ishki ister ministrligi Ákimshilik politsiia komitetiniń tóraǵasy Maqsat Baibolov.
Onyń aitýynsha, mundai shara politsiianyń ruqsatynsyz satylǵan qarýmen jasalatyn qylmystyń sany kóbeigendikten qolǵa alynyp otyr.
«Úi aýlasynda oinap júrgen balalardy pnevmatikalyq tapanshamen qorqytqan mas adamdy politsiia ókilderiniń ustaǵan videosy áleýmettik jelige taraǵan bolatyn. Sol oqiǵa sózimizge mysal bola alady», - dedi M. Baibolov.
IIM deregi boiynsha, 2017 jyldan bastap pnevmatikalyq qarý kómegimen 129 qylmys jasalǵan. Onyń 28-i qaraqshylyq, 79-y buzaqylyq, úsheýi kisi óltirýge oqtalý retinde tirkelgen.
Al 2018 jyly Qazaqstanǵa sporttyq sharalarda belgi berýge arnalǵan 4 myńnan astam signaldyq qarý ákelingen.
Baibolovtyń aitýynsha, qazaqstandyqtarǵa ózin-ózi qorǵaý maqsatynda travmatikalyq qarý ustaýǵa ruqsat berilmeidi.
Mánerlep syrǵanaýshy Denis Tenniń qaiǵyly qazasynan keiin qazaqstandyqtar ózin-ózi qorǵaý maqsatynda travmatikalyq qarý paidalanýǵa qaita ruqsat berýdi suraǵan bolatyn. Ministrlik ókili vedomstvonyń bul máseledegi ustanymy týraly aitty.
«Bul máseleni biz qarastyrdyq. Taldaý jasai kele, ondai qajettilik joq degen sheshimge keldik. Travmatikalyq qarýǵa 2014 jyly tyiym salynǵan bolatyn. Sońǵy 5 jylda sonyń oń áseri baiqaldy. Kóptegen adamdar ony zańǵa qaishy maqsattarda paidalandy. Qarýy bar adamdar kez kelgen kikiljiń barysynda ony qarsylasyna kezenýdi ádetke ainaldyrdy. Sondyqtan basqa elder siiaqty biz de tyiym engizgen bolatynbyz. Ol tyiymnyń kúshin joiatyndai qajettilik kórip otyrǵan joqpyz. Pnevmatikalyq qarý sporttyq jaraq sanatyna jatady. Sondyqtan ol tek nysana kózdeýde ǵana qoldanylýy kerek», - dedi M. Baibolov.
