Soltústik Qazaqstan oblysynda Qarttar kúnine orai aýyldyq okrýgter zeinetkerleriniń arasynda spartakiada ótti, dep habarlaidy QazAqparat.
Qyzyljar aýdany Beskól aýylynda zeinetkerler arasynda ótken spartakiada – dástúrli. Byltyr indetke bailanysty kezdese almaǵan ata-ájeler, bul spartakiadany asyǵa kútken eken. Ardagerler keńesi uiymdastyrǵan is-sharaǵa aýdandaǵy 19 aýyldyq okrýg zeinetkerleri óz komandasyn ákelgen. Olar shahmat, toǵyzqumalaq, ústel tennisi, doiby jáne darts siiaqty sport túrlerinen jarysty.
Jetpisbai Bazylov Roshinskoe eldi mekeniniń turǵyny. Zeinetker spartakiadaǵa toǵyzqumalaq oinaý úshin kelipti.
«Toǵyzqumalaqty toqsanynshy jyldary úirendim, oǵan deiin bul oiyndy bilmedik qoi. Qazir nemerelerimdi baýlyp júrmin. Spartakiadaǵa qýana-qýana keldim. Indetke bailanysty eshqaida shyǵa almai qaldyq qoi. Búgin qanshama tanys-joldastardy kórip, sergip qaldym», - deidi aýyl turǵyny.
Qyzyljar aýdanynda ǵana 9 myńnan astam zeinetker bar, sonyń 2 myńy Beskól aýylynda turady. Biyl aýdan ortalyǵynan úsh komanda qatysýǵa ótinish bildirdi, olardyń ekeýi – bilim berý jáne quqyq qorǵaý organdarynyń zeinetkerlerinen qurylǵan.
«Spartakiadaǵa zeinetkerlerimiz aldyn ala daiyndalady, kútedi. Bul – olar úshin úlken mereke. Dastarhan jaiyp, shái ázirledik. Túski as beremiz. Kontsert daiyndadyq. Desek te, pandemiiaǵa bailanysty biyl qatysýshylardyń sany jyldaǵydan eki ese az, saqtyq sharalaryn ustanýǵa týra kelip otyr. Búgingi jeńimpazdarǵa, spartakiadaǵa qatysýshylarǵa syilyqtarymyz bar. Eshqaisy eskerýsiz qalmaidy», - deidi Qyzyljar aýdandyq ardagerler keńesiniń tóraǵasy Boranbai Qojahmetov.
