QR Saýda jáne integratsiia ministri Baqyt Sultanov aldaǵy ýaqytta kartop baǵasynyń ósýine jol bermeý úshin qandai qadamdar jasalatynyn aitty. Ministrdiń paiymynsha, bul máselede memlekettik ári jergilikti atqarýshy organdar, biznes qoǵamdastyq, sondai-aq fermerler ózara is-qimylda jumys istese, naqty nátije bolady, dep habarlaidy "Ult aqparat".
«Qazirgi kezde bul - qoǵam men biznesti alańdatyp otyrǵan ózekti másele. Ásirese, áleýmettik jelilerde syn aitylyp jatyr. Biraq naryqta qalyptasqan bul jaǵdai usynys pen suranys teńgeriminiń jáne óńirler arasyndaǵy kókónis ónimderi boiynsha saýda qatynastarynyń úzilýine bailanysty týyndap otyr. Mundai jaǵdaidy bizde ǵana emes, kórshiles elderde de kórip otyrmyz», - dep toqtaldy Sultanov onlain rejimde halyq aldynda esep berýi kezinde.
Onyń aitýynsha, Reseide suranys artyp otyr. Sondyqtan elimizde kartop baǵasynyń sharyqtaýyna jol bermes úshin tiisti aqparattyq júielerdiń múmkindigi nazarǵa alynady.
«Bul jaǵynan eksporttyq suranys pen importtyq múmkinshilikterdi qarap otyrý kerek. Mysyrdan, Pákistannan jáne basqa elderden alyp kelsek, bul qymbat kókónister jalpy baǵanyń kórsetkishterin kóterip turady. Osy oraida kórshiles eldermen birlese bul problemany sheshýge tyrysatyn bolamyz. Ózbekstanda da kókónis baǵasy edáýir kóterilip otyr. Sonymen qatar, etke suranys bolǵannan keiin, byltyr bizdegi ettiń eksporty edáýir ósti. Bul óz kezeginde ishki naryqta baǵaǵa áserin tigizetini anyq», - dedi Sultanov.
Onyń paiymynsha, bul máselede memlekettik ári jergilikti atqarýshy organdar, biznes qoǵamdastyq, sondai-aq fermerler ózara is-qimylda jumys istese, naqty nátije bolady. Sonda ǵana ónim baǵasy kúrt kóterilmeidi.
