Foto: videodan kadr
Qyrǵyzstanda qarly boranda belýardan asatyn qardy keship, mektepke bara jatqan balanyń videosy áleýmettik jelide keń tarady. Osy beinejazbadan keiin Qyrǵyzstan Prezidenti Sadyr Japarov oqýshyny prezidenttik jańa jyldyq shyrshaǵa shaqyrdy, dep habarlaidy Ult.kz AKIpress-ke silteme jasap.
Áleýmettik jelide tanymal bolǵan oqýshy — Osh oblysy Qara-Kólja aýdanyna qarasty Koo-Chaty aýylyndaǵy «Aidyń-Kól» bastaýysh mektebiniń 4-synyp oqýshysy Nurzaman Almazbekov. Video kadrlarynda ol qar qalyńdyǵy bir metrge jýyqtaǵan jolmen mektepke bet alyp bara jatqany kórinedi.
Qyrǵyzstan Prezidenti Ákimshiliginiń aqparattyq saiasat qyzmetiniń jetekshisi Daiyrbek Orýnbekovtiń aitýynsha, Memleket basshysy bul videony ózi kórip, balanyń bilim alýǵa degen yntasyna erekshe riza bolǵan.
«Sadyr Nurǵojoevich bul beinejazbany ózi kórdi. Qiyn jaǵdaiǵa qaramastan, bilimge umtylǵan balanyń tabandylyǵy Prezidenttiń kóńilinen shyqty. Mundai jigerli ári talapty balalar erekshe qoldaýǵa laiyq. Sondyqtan ony prezidenttik jańa jyldyq shyrshaǵa shaqyrýdy tapsyrdy. Sondai-aq Memleket basshysynyń atynan oqýshyǵa arnaiy syilyq ázirlenip jatyr», — dedi ol.
Basylym málimetinshe, Nurzaman — alty balaly otbasyndaǵy tórtinshi bala. Ol mekteptegi úzdik oqýshylardyń biri, ásirese matematika men qyrǵyz ádebietine qyzyǵýshylyq tanytady. Sonymen qatar sýret salýdy jaqsy kóredi jáne fýtbolmen ainalysady.
