Kollaj: Tengrinews.kz
Qyzylordada qudyqqa qulap ketken 2 jasar balany qutqarý operatsiiasyn 48 jastaǵy otstavkadaǵy politsei Talǵat Myrzabekov uiymdastyrǵany belgili boldy, - dep habarlaidy Tengrinews.kz.
Er adamnyń aitýynsha, ol sol kúni kólikte bankke ketken áielin kútip otyrǵan. Sol jerde júkti áieldiń: "Balam qulap qaldy!" - dep aiǵailaǵan daýysyn estigen.
"Ne bolǵanyn bilý úshin júgirip bardym. Bala jartylai sýǵa tolǵan káriz qudyǵyna qulap ketipti, odan jaǵymsyz iis shyǵyp turdy. Bala qaita aiaǵymen qulapty, jeńil jaraqat alǵan, ol moinyna deiin las sýǵa batyp, jylap turdy", - deidi Talǵat Myrzabekov.
Burynǵy politsei ózi túspek bolǵan, biraq iri deneli bolǵandyqtan káriz qudyǵyna syimaitynyn túsingen. Jaqyn jerde 15 jastaǵy Arman Amanjolov turǵan. Biraq jasóspirim sýǵa toly tereń qudyqqa túsýge batyly jetpegen.
"Men oǵan kómektesetinimdi, ustap turatynymdy aittym. Dál osy kezde taǵy eki jigit júgirip keldi. Olar meniń aiaǵymnan ustady, men Armandy ustadym. Balany da, Armandy da birge alyp shyqtyq. Osydan keiin sol jerde turǵan erli-zaiypty úsheýin kólikke otyrǵyzyp, balalar aýrýhanasyna jetkizdi. Bul ýaqytqa deiin qutqarýshylar da, basqa qyzmetter de kelgen joq. Adamdar habarlasyp jatty. Odan keiin kórmedim", - deidi otstavkadaǵy podpolkovnik.
Sýret: ©Tengrinews.kz
Talǵat Myrzabekov otstavkadaǵy podpolkovnik, ómir boiy qylmystyq izdestirý bóliminde qyzmet etken. Densaýlyǵyna bailanysty 2015 jyly zeinetkerlikke shyqqan. Ákesi Tolysbek Myrzabekuly da polkovnik 2000 jyly qaitys bolǵan. Oblys ortalyǵyndaǵy kóshelerdiń birine onyń esimi berilgen eken.
"Maǵan eshqandai marapattyń qajeti joq, mende bári bar. Shynymdy aitsam, bul týraly bári bilgenin qalamadym, tek Almatyda turatyn anam Tańymkúl Ysqaqovaǵa aittym. Basynda senbedi, keiin balaǵa kómekteskenim úshin maqtady. Biraq men basqasha istei almadym, óitkeni meniń de Aisultan esimdi 4 jasar ulym bar. Meniń oiymsha, kez kelgen adam osylai jasar edi", - dep qosty ol.
Eske salaiyq, 19 tamyzda Qyzylordada tórt metrlik káriz qudyǵyna túsip ketken eki jasar balany kezdeisoq ótip bara jatqan jasóspirim qutqaryp qalǵan.
Arman Qyzylordaǵa M.Ihsanov atyndaǵy Qyzylorda politehnikalyq kolledjine túsý úshin kelgen. Tańdaǵan mamandyǵy - elektrik. Ol - kópbalaly otbasynan shyqqan jigit.
