Prezidenttiń kómekshisi Erlan Qarin Májiliste talqylanǵan júrgizýshi kýáligin alyp júrmegeni úshin jaýapkershilikten bosatatyn zań jobasy týraly pikir bildirdi, dep habarlaidy "Ult aqparat".
«Búgin Májiliske «Qazaqstan Respýblikasynyń keibir zańnamalyq aktilerine jol qozǵalysy máseleleri boiynsha ózgerister men tolyqtyrýlar engizý týraly» zań jobasy kelip tústi. Ony Ishki ister ministrligi Memleket basshysynyń tapsyrmasy boiynsha Ulttyq senim keńesi aiasynda ázirledi. 2019 jyldyń jeltoqsanynda Ulttyq keńestiń ekinshi otyrysynda Prezident Qasym-Jomart Toqaev kólik júrgizýshilerin úide keibir qujatty umytyp ketkeni úshin jazalaýdy toqtatý týraly buiryq berdi. Ózderińiz biletindei, qazir júrgizýshiler ózimen birneshe qujatty, atap aitqanda jeke kýálik, kólik júrgizý kýáligin, tirkeý kýáligi, tehnikalyq jáne saqtandyrý qujatyn alyp júrýi tiis. Prezident qaǵaz qujattardyń sanyn azaityp, barlyq derekterdi biriktirýdi usyndy. Úkimetke osy máselelerdiń barlyǵyn pysyqtaýdy tapsyrdy. Nátijesinde tiisti zań jobasy ázirlendi», - dep jazady Erlan Qarin.
Endigi kezekte jańa normalarǵa sáikes avtokólikpen júrgen kezde tek bir ǵana qujat – jeke kýálik nemese júrgizýshi kýáligi talap etiledi.
«Qazirgi ýaqytta respýblikada 4,2 millionǵa jýyq kólik tirkelgen. Árbir úshinshi azamat kólik basqarýǵa quqyly. Sondyqtan bul normalardyń qabyldanýy halyqtyń edáýir bóligin qamtidy», - degen Erlan Qarin áleýmettik jeli arqyly Prezidenttiń 2019 jylǵy 20 jeltoqsandaǵy Ulttyq keńestiń ekinshi otyrysynda sóilegen sóziniń videosyn jariialady.
Eske sala ketsek keshe Májiliste «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgerister men tolyqtyrýlar engizý týraly» QR zańynyń jobasy boiynsha qorytyndy ázirleitini habarlanǵanbolatyn.
«Zań jobasy júrgizýshiniń júrgizýshi kýáligi men Qazaqstan Respýblikasynda berilgen kólik quraly tirkeý kýáligin ózimen birge alyp júrýdi mindetteitin normany buzǵany úshin ákimshilik jaýapkershilikti alyp tastaýdy, sondai-aq kólik quraldarynyń keibir túrlerin paidalaný tártibin retteýge baǵyttalǵan. Komitet atalǵan zań jobasyn jumysqa alýǵa jáne ol boiynsha 2021 jylǵy 26 qarashaǵa deiin qorytyndy ázirleýge daiyn», - dedi Májilis depýtaty.
