Almatyda Memlekettik hatshy Erlan Qarinniń tóraǵalyǵymen jańartylǵan quramdaǵy Qazaqstan Respýblikasy Prezidenti janyndaǵy Jastar saiasaty jónindegi keńestiń birinshi otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Keńestiń jańa quramyna qoǵam belsendileri, jas ǵalymdar men kásipkerler, óńirlerdiń, aýyl jáne shyǵarmashyl jastardyń ókilderi, «Táýelsizdik urpaqtary» grantynyń iegerleri, Prezidenttik jastar kadrlyq rezerviniń músheleri, jastar uiymdarynyń kóshbasshylary kirdi.
Jiynda Erlan Qarin Memleket basshysy Joldaýynyń negizgi baǵyttaryna toqtaldy. Ol Prezident usynǵan reformalar memleket jańǵyrýynyń jańa kezeńi ekenin, Jańa Qazaqstandy qurý men jańa bastamalardyń bastaýy bolyp tabylatynyn atap ótti. Bul reformalar halyq arasynda, ásirese jastar ortasynda úlken qoldaýǵa ie.
Bul rette Jastar keńesiniń róli artady. Óitkeni Keńes múshelerin zań jobalaryn, tujyrymdamalardy jáne basqa da strategiialyq qujattardy talqylaýǵa qatystyrý kózdelgen.
Qazirgi ýaqytta Parlament Májilisinde «Jastar saiasaty týraly» zań jobasy qaralyp jatyr. Erlan Qarin Keńes ókilderin Májilistegi jumys toptarynyń quramyna engizýdi usyndy. Budan bólek, Jastar saiasaty jónindegi keńestiń júieli jumys isteýi úshin onyń janynan túrli komitetter qurý josparlanǵan.
Jiynda QR Premer-Ministriniń orynbasary Eraly Toǵjanov, QR Bilim jáne ǵylym ministri Ashat Aimaǵambetov, Eńbek jáne halyqty áleýmettik qorǵaý ministri Serik Shápkenov jáne «Jastar» ǵylymi-zertteý ortalyǵynyń direktory Áziz Ysqaqov baiandama jasady.
Kezdesý sońynda Keńes músheleri memlekettik organdardyń basshylaryna óz saýaldaryn qoiyp, usynystaryn aitty.
