QR Memlekettik keńesshisi Erlan Qarinniń tóraǵalyǵymen Sybailas jemqorlyqqa qarsy is-qimyl máseleleri jónindegi komissiianyń otyrysy ótti, dep habarlaidy "Ult aqparat" Aqordanyń baspasóz qyzmetine silteme jasap.
Jiynda Qazaqstan Respýblikasynyń sybailas jemqorlyqqa qarsy saiasatynyń 2022-2026 jyldarǵa arnalǵan tujyrymdamasynyń júzege asyrylýy jáne Eýropa Keńesi janyndaǵy sybailas jemqorlyqqa qarsy kúres boiynsha memleketter tobynyń (GREKO) usynymdary qarastyryldy.
Birinshi másele boiynsha Erlan Qarin sybailas jemqorlyqqa qarsy júieli kúres Prezident reformalarynyń basym baǵyttarynyń biri ekenin aitty. Osy oraida jyl basynda 2022-2026 jyldarǵa arnalǵan sybailas jemqorlyqqa qarsy saiasat tujyrymdamasy qabyldandy. Tujyrymdama strategiialyq mindetterge qol jetkizýge, sybailas jemqorlyqtyń alǵysharttaryn joiý jáne jemqorlyq deńgeiin tómendetý boiynsha keshendi jumys júrgizýge, qoǵamda sybailas jemqorlyqqa qarsy immýnitetti qalyptastyrýǵa jáne halyqtyń ál-aýqatyn arttyrýǵa baǵyttalǵan.
Tujyrymdama institýtsionaldyq jáne naqty baǵyttardy qamtidy. Sonymen qatar sybailas jemqorlyqqa qarsy jańa tetikterdi pysyqtaýdy, memlekettik organdar men azamattyq qoǵam sýbektilerin sybailas jemqorlyqty joiý jónindegi jumysqa qatystyrýdy kózdeidi.
Memlekettik keńesshi atalǵan jumystyń tiimdi iske asýy tiisti memlekettik organdar men uiymdardyń jaýapkershiligine tikelei bailanysty ekenin atap ótti.
Osy oraida, komissiia otyrysynda Tujyrymdamany oryndaýǵa qatysty problemalar kórsetilip, syn-eskertpeler aityldy.
Ekinshi másele boiynsha elimizdiń Halyqaralyq sybailas jemqorlyqqa qarsy GREKO bastamasyna qatysý perspektivasy talqylandy.
Erlan Karinniń pikirinshe, GREKO aiasyndaǵy ózara tiimdi yntymaqtastyq kóptegen damyǵan elderde tájiribeden ótken jáne iske asyrylyp jatqan sybailas jemqorlyqqa qarsy is-qimyl tetikterin qabyldaýǵa múmkindik beredi.
Otyrysta talqylanǵan máselelerdi eskere otyryp, Komissiia naqty usynymdar ázirledi. Memlekettik keńesshi Erlan Qarin jiyn qorytyndysy boiynsha birqatar tapsyrma berdi.
