QR Prezidentiniń keńesshisi Erlan Qarin Májilis maquldaǵan parlamenttik oppozitsiiaǵa qatysty zań jobasyna pikir bildirdi, dep habarlaidy "Ult aqparat".
«Búgin Májilistiń jalpy otyrysynda 2019 jyldyń jeltoqsanynda ótken Ulttyq keńestiń ekinshi otyrysynda jariialanǵan prezidenttik saiasi reformalar toptama aiasynda ázirlengen taǵy bir mańyzdy zań jobasy qaraldy. Atap aitqanda, májilismender «QR Parlamenti jáne onyń depýtattarynyń mártebesi týraly» QR Konstitýtsiialyq zańyna tolyqtyrýlar engizý týraly» QR zańynyń jobasyn talqylady. Atalǵan zań jobasynda parlamenttik oppozitsiia (azshylyq) institýtyn engizý, sonymen qatar parlamenttik azshylyq depýtattarynan Parlament Májilisiniń bir turaqty komitetiniń tóraǵasy jáne 2 hatshysy laýazymynda kandidatýra usyný quqyǵyna kepildik berý kózdelgen. Bul oraida eń mańyzdysy, oppozitsiia usynǵan kandidatýraǵa daýys berý oppozitsiia ókilderiniń biri sailanǵanǵa deiin jalǵasatyn bolady. Basymdyqqa ie partiia ókili bul laýazymǵa sailana almaidy», - dep jazdy Erlan Qarin Facebook paraqshasynda.
Onyń atap ótýinshe, jańa normalarǵa sáikes, parlamenttik oppozitsiiaǵa parlamenttik tyńdaýlar ótkizý, sondai-aq Májilistegi Úkimet saǵatynyń kún tártibin jasaqtaý quqy,y beriledi. Bul normalardy paidalaný úshin belgili bir partiia ózin oppozitsiiamyn dep jariialaý tiis.
«Ulttyq keńes uiytqy bolǵan bul zań jobasy ózge de zań jobalary siiaqty talqylaýlar men pikir almasýdyń uzaq jolynan ótti. Atap aitqanda, ol Májilistiń barlyq komitetterinde talqylandy. Tek bas komitettiń ózinde osy zań jobasy boiynsha jumys tobynyń 7 otyrysy boldy. Búgin de japy otyrys barysynda bul zań jobasyna qatysty óte qyzyý pikirtalas boldy. Degenmen, basqa zań jobalaryna qaraǵanda oǵan depýtattardyń ózderi, onyń ishinde «Aq jol» partiiasynyń fraktsiiasy bastamashylyq jasaǵan edi. Bul da tań qalarlyq jait emes. Sebebi bizdiń zańnamamyzdaǵy múldem jańa norma jaiynda sóz bolyp otyr. Jáne de tek zańnamada ǵan emes, tolyqtai alǵanda saiasi tájiribede jáne mádeniette», - dedi QR Prezidentiniń keńesshisi.
Eske alsaq, Májilis Parlamenttik oppozitsiiaǵa kepildik beretin qadamdardy maquldaǵany týraly habarlaǵan bolatynbyz.
