Qazaqstan koronavirýs pandemiiasymen birge kelgen aýyr synaqty eńsere bildi. Prezident kómekshisi, Qazaqstannyń halyqaralyq qatynastar jónindegi keńesiniń tóraǵasy Erlan Qarin Qazan qalasyndaǵy «Valdai» halyqaralyq pikirtalas klýby aiasyndaǵy kezdesýde osyndai pikir bildirdi, dep habarlaidy QazAqparat.
Spiker koronavirýspen kúreske qaramastan, byltyr Qasym-Jomart Toqaev 2019 jylǵy jeltoqsanda Ulttyq qoǵamdyq senim keńesiniń otyrysynda aitqan saiasi reformalardyń birinshi paketi tolyq iske asyrylǵanyn atady.
«Atap aitqanda, saiasi reformanyń birinshi paketi aiasynda mitingiler týraly múldem jańa zań ázirlenip, qabyldandy. Reformalar, sondai-aq, sailaý, partiialar, Parlament týraly zańnamaǵa jáne saiasi partiialar qurý úshin tirkeý kedergisin 40 myńnan 20 myń adamǵa deiin tómendetýdi, sailaý partiialyq tizimderinde áielder men jastar úshin 30% kvotany engizýdi, parlamenttik oppozitsiia institýtyn engizýdi qamtityn basqa da baǵyttarǵa qatysty boldy. Budan basqa, ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi fakýltativtik hattamany ratifikatsiialaý týraly» QR Zańyna qol qoiyldy», - dedi Prezident kómekshisi.
Sonymen qatar, Erlan Qarin saiasi júieni reformalaý baǵytyndaǵy ekinshi jáne úshinshi paketterdiń qolǵa alynǵanyn eske saldy. Nátijesinde 2021 jyldyń ekinshi jartysynda elimizde aýyldyq okrýgter ákimderiniń tikelei sailaýyn ótkizý josparlanyp otyr.
«2020 jyly memlekettik josparlaý jáne basqarý júiesinde mańyzdy ózgerister boldy. Prezidentke tikelei baǵynatyn Strategiialyq josparlaý jáne reformalar jónindegi agenttik quryldy. Onyń qaramaǵyna Statistika komiteti kirdi. Sondai-aq, memlekettik josparlaý júiesinde memlekettik baǵdarlamalardan ulttyq jobalarǵa kóshý júzege asyryldy», - dedi saiasatker.
Erlan Qarinniń aitýynsha, pandemiiamen bailanysty jaǵdai belgili bir baǵyttarda reformalar júrgizý protsesin jedeldetken. Máselen, ótken jyldyń mamyr aiynda Ulttyq qoǵamdyq senim keńesiniń úshinshi otyrysy ótip, ol bilim berý jáne densaýlyq saqtaýdy damytý máselelerine arnaldy.
«Koronavirýs pandemiiasy kóptegen jaǵdaida aimaq elderiniń basshylaryn ózara is-qimyldyń qashyqtyq formatyna kóshýge májbúr etkenine qaramastan, bul yntymaqtastyqtyń turaqtylyǵy men sapasyna áser etken joq. EAEO, ShYU jáne basqa da birlestikter alańdaryndaǵy ózara is-qimyl, onyń ishinde koronavirýsqa qarsy kúres sharalaryn úilestirý kúsheitildi. Osyndai sharalardyń ishinde taýarlardy importtaý úshin «jasyl dáliz» qurýdy, dárilik jáne dezinfektsiialaý quraldaryn, meditsinalyq preparattardy jáne ózge de zattardy óndirý úshin jekelegen komponentter men materialdardy EAEO aýmaǵyna ákelýdiń bajsyz rejimin engizilgenin atap ótken jón», - dep qosty spiker.
Prezident kómekshisi shekteý sharalarynyń jeńildetilýine qarai elder arasyndaǵy áýe qatynasy jedel qalpyna keltirilgenin de sóz etti. Tiimdi ózara is-qimyl Qazaqstan men Reseige vaktsinany jetkizý boiynsha ýaǵdalastyqqa qol jetkizýge múmkindik bergeni, 1 aqpannan bastap Qazaqstanda halyqty koronavirýsqa qarsy reseilik «Spýtnik V» vaktsinasymen vaktsinatsiialaý bastalǵany aityldy. Qaraǵandy farmatsevtikalyq kesheniniń bazasynda reseilik vaktsina óndirisi jolǵa qoiylǵan.
«Qazirgi tańda el azamattary qazaqstandyq QazVac, reseilik «Spýtnik V» vaktsinalaryn nemese qytailyq tehnologiia boiynsha óndirilgen Hayat-Vax arab vaktsinasyn alý múmkindigi bar. Pandemiiaǵa qarsy sharalardan basqa baǵyttarda biraz jumys atqaryldy. Máselen, 2020 jyldyń sońynda Joǵary Eýraziialyq ekonomikalyq keńeste Eýraziialyq ekonomikalyq integratsiiany damytýdyń 2025 jylǵa deiingi strategiialyq baǵyttary bekitildi. Olar aldaǵy 5 jylda birlesken ózara is-qimylǵa baǵdar bolady», - dep túiindedi Erlan Qarin.
