«Ardagerler týraly» Zańnyń qabyldanýy - ardagerlerimizge laiyqty qamqorlyq kórsetýdiń taǵy bir kórinisi. Bul týraly Prezidenttiń keńesshisi Erlan Qarin málim etti, dep habarlaidy "Ult aqparat".
«Búgin, Otan qorǵaýshylar kúni Prezident Qasym-Jomart Toqaev «Ardagerler týraly» Zańǵa qol qoidy. Bul zańmen aǵa urpaq ardagerlermen qatar, Táýelsizdik jyldary (Tájik-Aýǵan shekarasy men Irakta) áskeri boryshyn atqarǵan ardagerlerdiń de áleýmettik jaǵdaiy qamtamasyz etiledi», - dep jazdy E. Qarin áleýmettik jelidegi paraqshasynda.
Osy oraida ol bul zańnyń birqatar normalary Ulttyq keńestiń aiasynda kóterilip, talqylanǵanyn eske saldy.
«Sol usynystarǵa qatysty Prezident Úkimetke, tiisti memlekettik organdarǵa tapsyrma berip, óz baqylaýyna alǵan bolatyn. Sondyqtan, bul zańnyń qabyldanýy Memleket basshysynyń ardagerlerimizge laiyqty qamqorlyq kórsetýdiń taǵy bir kórinisi», - dedi Erlan Qarin.
Aita keteiik, Memleket basshysy «Ardagerler týraly» Qazaqstan Respýblikasynyń Zańyna qol qoiǵan bolatyn.
Budan buryn habarlanǵandai, 30 sáýir kúni Parlament Senatynyń jalpy otyrysynda «Ardagerler týraly» Zańy qabyldandy.
Zań jobasynyń negizgi maqsaty – ardagerlerdi áleýmettik qorǵaýǵa bailanysty qoǵamdyq qatynastardy retteitin zańnamalyq aktilerdi júieleý, qaita qaraý jáne ardagerlerdiń jańa sanattaryn qalyptastyrý.
Sonymen qatar, jalpy otyrysta «Qazaqstan Respýblikasynyń keibir zańnamalyq aktilerine áleýmettik qamsyzdandyrý máseleleri boiynsha ózgerister men tolyqtyrýlar engizý týraly» ilespe Zań eki oqylymda qaralyp, qabyldandy.
Ony ázirleý qajettiligi birqatar zańnamalyq aktilerdi «Ardagerler týraly» zań jobasyna sáikes keltirýmen bailanysty. Negizgi jańa ózgerister áleýmettik tólemderge qatysty bolyp otyr.
