Ulttyq qoǵamdyq senim keńesiniń hatshysy Erlan Qarin beibit jiyndar týraly zańnyń bir jyl ishinde qandai nátije bergenin aitty, dep habarlaidy QazAqparat.
«Prezidenttiń saiasi reformalarynyń aiasynda jariialanǵan birinshi paket tolyq júzege asyrylǵan bolatyn. Sonyń aiasynda 8 zań qabyldandy. Onyń ishindegi eń úlken zańdardyń biri – jiyndar týraly zań bolatyn. Bul zańnyń qabyldanǵanyna bir jyldan asty. Sol bir jyldyń ishinde beibit jiyndar men mitingiler týraly zań qalai jumys istedi? Jaqynda ǵana sarapshylarmen osy máseleni talqylaǵanbyz. Sol kezde sarapshylar bul zańnyń is júzinde qandai ózgerister alyp kelgenin aitty. Baiqasańyzdar, ártúrli qoǵamdyq toptar emin-erkin beibit jiyndar ótkizý quqyǵyna ie bolyp, úlken qalalardyń ortalyqtarynda jiyndar ótip jatyr», - dedi Erlan Qarin Ulttyq keńestiń eki jyldaǵy jumysy talqylanǵan jiynda.
Sondai-aq, ol atalmysh zańnamalyq ózgeris elimizdegi saiasi pliýralizmniń damýyna, belsendi azamattyq jáne qoǵamdyq toptardyń óz máselelerin ortaǵa shyǵaryp talqylaýyna múmkindik bergenin atady.
