Basty basymdyq - bul azamattarymyzdyń densaýlyǵy men qaýipsizdigi. Bul týraly QR Prezidentiniń kómekshisi Erlan Karin Telegram paraqshasynda jazdy, dep habarlaidy "Ult aqparat".
«Eldegi tótenshe jaǵdaidyń alǵashqy aptasy ótti. Tótenshe jaǵdaidyń eń birinshi kúninen bastap bilik jedel ári jaǵdaidyń aldyn orap áreket etti. Tótenshe jaǵdai engizý sharalary men eki iri qala — Nur-Sultan men Almatyda karantin boiynsha airyqsha rejim engizý durys boldy. Bul aýrý juqtyrý jaǵdailary baiqalǵan negizgi qalalardy oqshaýlaýǵa jáne virýstyń ózge qalalarǵa aýqymdy taralýyna jol bermeýge múmkindik jasady. Jańa virýs juqtyrǵan adamdardyń Almaty, Qaraǵandy jáne Aqtóbe oblystarynda tirkelý faktisi shetelden kelgen azamattarmen bailanysty boldy. Juqtyrǵandar sany ósip kele jatqanymen keibir ózge elderdegidei aýqymda óte qarqyndy emes. Munyń barlyǵy da qatań, batyl ári jedel sharalardyń arqasynda oryn aldy» - dedi QR Prezidentiniń keńesshisi.
Onyń atap ótýinshe, ortalyq jáne óńirlik bilik qysqa ǵana ýaqyttyń ishinde qajetti resýrstardy jumyldyryp, barlyq qyzmetterdiń jumysyn jolǵa qoia aldy. Bul memlekettiń mundai aýqymdaǵy daǵdarysty jaǵdaida áreket etýge qabiletti ekendigin kórsetedi.
«Tótenshe jaǵdai rejiminiń alǵashqy kúnderi qoǵamnyń da daǵdarys jaǵdaiynda judyryqtai jumylýǵa qabiletti ekendigin kórsetip berdi. Tótenshe jaǵdai rejimi aiasynda engizilgen birqatar shekteý shalaryna, karantinnen týyndaǵan qolaisyzdyqtar men qiyndyqtarǵa qaramastan kóptegen qazaqstandyqtar qazirgi jaǵdaiǵa túsinistikpen qarap qoimai, ózara kómek kórsetip, túrli volenterlik, qaiyrymdylyq sharalaryna bastamashylyq jasap, qatysýda. Degenmen, jaǵdaidyń kúrdeliligin tolyq baǵalamaý áli de bar, barlyǵy birdei karantin men tótenshe jaǵdai talaptaryn túsinbeidi ári saqtamaidy. Óz kezeginde memleket azamattar men bizneske qoldaý kórsetý boiynsha baiypty sharalar kórsetip jatyr. Jergilikti jerlerde kórsetilip jatqan salyqtyq jeńildikter men ózge qoldaý sharalarynan bólek memleket tótenshe jaǵdai engizilýine bailanysty tabysynan aiyrylǵan tulǵalarǵa ai saiyn tólem jasaýǵa nietti», - dedi Erlan Karin.
Onyń aitýynsha, jaǵdai kúrdeli bolǵanymen baqylaýda tur. Degenmen, Prezident Qasym-Jomart Toqaev atap ótkendei, jaibaraqat júrýge bolmaidy. Kez kelgen qolaisyzdyqtarǵa jaǵdaidyń órbýine qatysty eń nashar nusqanyń ózine de daiyn bolýymyz qajet.
«Qazir álemdegi jalpy ahýaldyń qalai damityndyǵyna kóp jait táýeldi bolyp tur. Ókinishke qarai, keibir elder sharalardy keshigip qabyldady. Sondyqtan daǵdarys sozylýy múmin. Qazir memlekettik apparat jańa taktikalyq josparmen jáne munan arǵy jalpy strategiiamen jumys istep jatyr. Bul jaiynda Tótenshe jaǵdai jónindegi memlekettik komissiia otyrysynda búgin Prezident aitty. Qazirgi sáttegi basty basymdyq - bul azamattarymyzdyń densaýlyǵy men qaýipsizdigi. Barlyq memlekettik organdardyń jumysy eń aldymen osyǵan baǵyttalady», - dedi ol.
