Foto: © Sputnik / Vladislav Vodnev
Kárim Másimovke qatysty is boiynsha derekter jariialanbaidy. Bul týraly QR Ulttyq qaýipsizdik komiteti tóraǵasynyń orynbasary Marat Qalqabaev aitty, dep habarlaidy QazAqparat.
«Tergeý amaldary barysynda bári anyqtaldy. Árine, men kóp nárseni aita almaimyn. Biraq ol (Másimov) tiisti sheshim qabyldamady. Birinshi basshy ózi qabyldaýy tiis sheshimderdi qabyldamaǵan. Osymen boldy. Sondyqtan ol qylmystyq jaýapkershilikke tartylady», - dedi Qalqabaev Májiliste tilshiler suraǵyna jaýap bere otyryp.
Sonymen qatar ol is materialdarynyń derekteri jariialanbaitynyn aitty.
«Is derekteri óte qupiia. Ol boiynsha tolyq aqparat berilmeidi. Memlekettik qupiiany jariia etpeý týraly zań bar. Qylmystyq is «óte qupiia» sanatyna jatqyzylǵan», - dedi Marat Qalqabaev.
Budan buryn habarlanǵandai, biyl sáýir aiynda Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komitetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojinge, M.Osipovke qatysty qylmystyq is boiynsha úkimin jariia etti.
Sot sheshimimen atalǵan úsh bap boiynsha da kináli dep tanylǵan K.Másimov - 18, A.Sadyqulov - 16 jylǵa, D.Erǵojin taǵylǵan aiyptarǵa sáikes - 15 jylǵa, M.Osipov bolsa bilik pen laýazymdyq ókilettigin asyra paidalaný babymen 3 jylǵa bas bostandyǵynan aiyryldy. Sottalýshylardyń barlyǵy ómir boiy memlekettik qyzmette laýazym ielene almaidy. Sonymen qatar barlyǵy general shenderinen jáne memlekettik nagradalarynan aiyrylady.
