Qaratal aýdanynyń ekonomikasyna 8 mlrd. teńgeden astam investitsiia tartyldy. Bul týraly búgin Almaty oblysynyń ákimi Amandyq Batalovtyń qatysýymen ótken Qaratal aýdany ákiminiń esepti kezdesýinde aityldy, dep habarlaidy "Ult aqparat" ákimdiktiń baspasóz qyzmetine silteme jasap.
Kezdesý aldynda aýdan ákimi Qairat Buldybaev aýdandyq mádeniet úiiniń foiesine qoiylǵan kórme arqyly 2019 jyldyń kórsetkishteri men 2020 jyldyń josparlary týraly aqparattarmen tanystyrdy.
Máselen, 2020-2025 jyldary aýdanda birqatar mańyzdy investitsiialyq jobalar júzege asyrylady. Olardyń qatarynda et jáne shujyq ónimderin shyǵaratyn, balyq ósirip, óńdeitin, munai óńdeitin nysandar, sol siiaqty 20 myń basqa arnalǵan mal bordaqylaý alańy men qýaty táýligine 5,95 MVt bolatyn kún elektr stansasy bar.
Halyq aldynda baiandama jasaǵan aýdan ákimi negizgi kapitalǵa tartylǵan investitsiia kólemi 8 mlrd. 688 mln. teńge bolǵanyn, onyń 992,4 mln. teńgesi aýyl sharýashylyǵyna tartylǵanyn atap ótti. Bul rette ónerkásip óniminiń kólemi 2 mlrd. 762 mln. teńgeni quraǵan. Shaǵyn jáne orta bizneste de jetistikter bar. Ótken jyldyń qorytyndysy boiynsha bul salada 16 mlrd. 700 mln. teńgeniń ónimi óndirilgen.
Q. Buldybaev TÚKSh salasyna, sonyń ishinde halyqty qoljetimdi turǵyn úimen, sapaly aýyz sýmen, gazben qamtý sharalaryna da toqtaldy.
Máselen, qazirgi kezde «Almaty Prodakshn Konstashn Invest» JShS gazdandyrýdyń taratý jelisi qurylysynyń jáne blok-modýldi qazandyqty ornatý jumystarynyń jobalyq-smetalyq qujattaryn daiyndaýda. Úshtóbe qalasyn gaz qubyryna qosý 3 kezeńmen júrgiziledi. Sonyń nátijesinde Úshtóbe qalasy men Bastóbe aýylynyń turǵyndary ortalyqtandyrylǵan gaz júiesine qosyla alady. Sonymen qatar «Almaty Prodakshn Konstashn Invest» JShS Qanabek, Jańatalap, Eskeldi bi, Qyzyljar aýyldaryna gaz júiesin tartý jumystaryn júrgizýdi josparlap qoisa, Ortatóbe, Oian, Kálpe, Kókdala, Tastóbe eldi mekenderine osyndai qurylystar júrgizýdiń JSQ-syn daiyndaýda.
Baiandamashy óz sózinde bilim berý, densaýlyq saqtaý, mádeniet pen sport, sol siiaqty jumyspen qamtý jáne jol jóndeý baǵyttary boiynsha da habardar etti.
Mysalǵa, biylǵy jyly aýdannyń avtokólik joldaryna ortasha jóndeý júrgizýge 260 mln. teńge bólingen. Sol siiaqty Úshtóbe – Almaly – Kópbirlik baǵytyndaǵy oblystyq mańyzdaǵy 28,2 km avtokólik jolyn jóndeýge taǵy 471 mln. teńge bólingen. Bul jumystar biylǵy jyly júzege asyrylady.
Aýdan ákiminiń sózinen keiin turǵyndar ózderin tolǵandyrǵan saýaldaryn qoidy.
Sonyń biri aýdan turǵyny Valentina Spiridonova «Úshtóbe qalasynyń aryq júieleri jańǵyrtyla ma?» degen suraq qoidy. Ol aryqtardyń qazirgi jaǵdaiy halyqty sýarmaly sýmen qamtamasyz etýge qaýqarsyz ekenin de jetkizdi. Sol siiaqty qalalyq káriz júieleri de jóndeýdi qajet etetinin aitty.
Osy suraqqa jaýap bergen Q. Buldybaev, aryq júielerin qaita jańartý jobasy daiyndalyp jatqanyn, ony tolyq jańǵyrtý úshin 500 mln. teńge kerek ekenin tilge tiek etti. Al káriz júielerin jóndeý naqty josparda bar.
Aýyl sharýashylyǵy jerlerin sýarmaly sýmen qamtamasyz etý máselesin Serikjan Baqytuly kóterdi. Sol siiaqty turǵyndar blok-modýldi qazandyqtardyń qalai jumys isteitinin, ony iske qosý protsesteri qalai júretinin de surap bildi. Oǵan qosa oqýshylar úshin qolaily bolatyn jańa avtobýs marshrýty qosylsa degen tilekterin de jetkizdi. Ardagerler Úshtóbede Jastarǵa qyzmet kórsetý ortalyǵy men dene shynyqtyrý-saýyqtyrý kesheni salynǵanyn qalaityndaryn aitty.
Jiynda qorytyndy sóz alǵan oblys ákimi Amandyq Batalov aýdannyń oń damý dinamikasyn, sonyń ishinde investitsiia tartýdaǵy jetistikterin atap ótti. Sol siiaqty oblystyń áleýmettik-ekonomikalyq kórsetkishterine de toqtaldy.
A. Batalovtyń aitýynsha, 2019 jyldyń qorytyndysy boiynsha oblystaǵy ekonomikalyq ósim 4,5 % qurap, jalpy óńirlik ónim 3 trln. teńgege jetken. 48 myń jumys orny qurylǵan, sonyń 31 myńy – turaqty jumys oryndary. Oblys ekonomkasynyń damý qarqynyn odan ári ósirý maqsatynda 2025 jylǵa deiingi investitsiialyq portfel qalyptastyrylǵan, onda jalpy quny 4,9 trln. teńge bolatyn, 40 myń jumys ornyn quratyn 422 joba bar.
Jalpy Qaratal aýdanyn damytýǵa ótken jyly 736,6 mln. teńge bólingen. Sonyń ishinde 81 mln. teńge – injenerlik infraqurylymdy damytýǵa, 289 mln. teńge – turǵyn úi qurylysy men sýmen qamtý jumystaryna, 385,5 mln. teńge – abattandyrý men jol jóndeýge bólingen. Biylǵy jyly aýdandy damytýǵa 1,2 mlrd. teńge bólinip otyr.
Aýdan turǵyndarynyń suraqtaryna jaýap bergen Amandyq Batalov, Úshtóbe qalasyndaǵy aryq jáne káriz júielerin jóndeýge qarjy kezeń-kezeńimen bólinetinin aitty. Sol siiaqty oblysta jalpy uzyndyǵy 16,7 myń shaqyrym bolatyn irrigatsiialyq júielerdi qalpyna keltirýge erekshe nazar aýdarylýda. Óńirde 1 millionnan 19 mlrd. tekshege deiingi barlyǵy 114 sý qoimasy bar.
- Aýyl sharýashylyǵy jerlerin sýarmaly sýmen qamtamasyz etý máselesine erekshe nazar aýdaryp otyrmyz. Máselen, Qyzylaǵash plotinasyn qalpyna keltirý arqyly 7 myń ga sýarmaly jerdi ainalymǵa qosamyz. Sol siiaqty Sarqan aýdanyndaǵy Pokatilovka sý qoimasyn josparǵa sai qalpyna keltirsek, bul taǵy 24 myń ga jerdi ainalymǵa qosýǵa múmkindik beredi. Al Úshtóbe qalasyna Jastarǵa qyzmet kórsetý ortalyǵyn salý týraly máselege bailanysty, onyń úlgi jobasy daiyn. Qurylysyn biyl bastaýdy tapsyramyn. Sol siiaqty DSO-nyń da jaqsy, qyzyqty jobasyn daiyndańdar. Oǵan qosa biylǵy jyly aýdandyq ortalyq aýrýhananyń kúrdeli jóndeý jumystaryn aiaqtaý kerek. Aýdandy gazdandyrý boiynsha jumysty qýzap, sapaly gazmen qamtamasyz etýdi tapsyramyn. Eldi mekenderdi damytýda «Aýyl – el besigi» baǵdarlamasynyń qosar úlesi zor. Biyl bul baǵdarlamaǵa oblysymyzdyń 21 aýyly enip otyr. Eń bastysy, bul baǵdarlamanyń múmkindikterin aýyldyq eldi mekenderdi kórkeitýge tiimdi paidalanyńdar. Biz birlese otyryp, aldymyzǵa qoiylǵan barlyq mindetterdi oń sheshemiz dep oilaimyn, - dedi A. Batalov.
Kezdesý azamattardy jeke máseleleri boiynsha qabyldaýmen jalǵasty. Oblys ákiminiń qabyldaýyna jazylǵan 10 adam óz saýaldaryn qoiyp, tiianaqty jaýap aldy.
Úshkómei aýyly men Úshtóbe qalasynyń aralyǵyndaǵy 3 shaqyrymdyq joldy jóndeý, Almaly aýylyndaǵy aýyldyq dárigerlik ambýlatoriiaǵa, A.Pýshkin atyndaǵy mektepke kúrdeli jóndeý jasaý, Kálpe aýylyndaǵy mektepke deiingi shaǵyn ortalyqtyń jumys ýaqytyn uzartý, Baishegir jáne Qyzylbalyq aýyldyq okrýgterinde órtke qarsy qyzmet pýnktterin ashý, qaz fermasyn ashýǵa qoldaý kórsetý – osy jáne ózge de máseleler azamattardy qabyldaý barysynda talqylandy. Árbir ótinish boiynsha Amandyq Batalov aýdan ákimi men tiisti basqarma basshylaryna tapsyrma berip, bul máselelerdiń oryndalýyn baqylaýyna alatynyn aitty.
