Qarasazda Muqaǵali Maqataevtyń 90 jyldyǵyn toilaý bastaldy, dep habarlaidy QazAqparat.
Zamanymyzdyń zańǵar aqyny Muqaǵali Maqataevtyń 90 jyldyq mereitoiyna daiyndyqqa Almaty oblysy ótken jyldan bastap kirisken edi. Jalpy mereitoidy ótkizýge jergilikti biýdjetten qomaqty qarjy bólindi. Aitýly sharaǵa orai qurylǵan arnaiy jumys tobyn oblys ákimi Amandyq Batalov ózi basqaryp, ázirlikti qurylys jáne kórkeitý jumystarynan bastaǵan, ári olardyń sapaly atqarylýyn nazarda ustady. Eń aldymen aqynnyń týǵan jeri Qarasaz aýyly, Qarasazben irgeles eldi meken Saryjaz, aýdan ortalyǵy Narynqol aýyldary abattandyryldy. Joldar jasalyp, aýyz sý júiesi jańǵyrtylyp, mádeni nysandar jóndeldi, saiabaqtar salý qolǵa alynyp, eskertkish ornatyldy.
Jalpy mereitoiǵa aldyn ala daiyndyq barysynda Qarasaz aýylyndaǵy aqyn mýzeiine, mádeniet úiine, A.Barmanbekuly atyndaǵy orta mektepke jóndeý jumystary jasalyp, nysandar jańa keiipke endi. Eldi mekenniń ortalyq kósheleri, ortalyq alańy abattandyrylyp, kóshe shamdary ornatyldy. Aýyz sý júiesi «Aýyl – el besigi» baǵdarlamasynyń aiasynda respýblikalyq biýdjetten bólingen 427,1 mln. teńgege qaita jańǵyrtýdan ótkizilip jatyr. Qarasaz aýylynda óner mektebin salý da – mereitoi aiasyndaǵy mańyzdy bastamalardyń biri. Qazir nysannyń jobalyq-smetalyq qujattary ázirlenýde. Aýylǵa kireberistegi Jastar saiabaǵy abattandyryldy. Irgeles Saryjaz aýylynda Raiymbek batyr eskertkishiniń mańy kórkeitilip, eskertkish janyndaǵy sý júiesi jóndeýden ótti, aýyldyń ortalyq kósheleri kóz súisiner keiipke keltirildi.
Biylǵy jyly 3 gektar aýmaǵy bar Muqaǵali atyndaǵy jańa saiabaqtyń qurylysy bastaldy. Quny 374,5 mln. teńgelik jobada kontserttik sahna, shaǵyn fýtbol alańy, balalar alańy, vorkaýt sport alańy, alleia, demalys aimaǵy qarastyrylǵan. Sol siiaqty aýdandyq ákimdik ǵimaratynyń janynan shaǵyn saiabaq salyna bastady. Al aýdandyq mádeniet úiiniń aldyndaǵy skver jáne ortalyq saiabaq abattandyryldy.
Osyndai úlken daiyndyq jumystarynyń nátijesinde kópshilik asyǵa kútken dáýirdiń dara tulǵasynyń 90 jyldyq toiy búgin óz shymyldyǵyn túrdi. Qarasaz Mádeniet úiinde «Muqaǵali – ǵasyr aqyny» atty ǵylymi-praktikalyq konferentsiia ótkizilip, onda QǴA Akademiiasynyń akademigi Baiynqol Qaliev, akademik Sherýbai Qurmanbaiuly, belgili qalamger, «Muqaǵali» jýrnalynyń bas redaktory Batyq Májit, qoǵam qairatkeri, qalamger Rysbek Sársembaiuly, ádebiet synshysy Amangeldi Keńshilikuly jáne basqa da ǵalymdar men qalamgerler aqynnyń ómiri men shyǵarmashylyǵyna qatysty tyń derekter men tereń taldaýlaryn ortaǵa saldy. Bir atap óterligi, osy jiynda baspa betin kórgen «Muqaǵali tili sózdigi» kitaby tanystyryldy. Bul kitapta aqynnyń tildik qoldanysyndaǵy sózder men sóz tirkesteriniń barlyǵy qamtylǵan.
Al erteńgi negizgi sharalarǵa Memlekettik hatshy Qyrymbek Kósherbaev, oblys ákimi Amandyq Batalov, Mádeniet jáne sport ministri Aqtoty Raiymqulova qatysady dep kútilýde. Olar jurtshylyqpen birge aqynnyń mýzeiin aralap, Narynqolda Muqaǵalidyń qoladan quiylǵan eńseli eskertkishin ashyp, aýyl azamattaryna jańa salynǵan turǵyn úilerdiń kiltin tapsyrady dep kózdelip otyr.
Jalpy «Men HHI ǵasyr urpaqtarynyń qurdasymyn. Bálkim, odan áridegi urpaqtardyń týysymyn da…» dep bolashaǵyn boljap ketken ǵasyr aqyny Muqaǵalidyń mereitoiy aiasyndaǵy mádeni ádebi-tanymdyq sharalar oblysta jyl boiy jalǵasyp jatyr. Bul rette búginge deiin Muqaǵalidyń sózine jazylǵan ánderden «Jyrlaidy júrek» ánshiler baiqaýy, sýretshilerdiń halyqaralyq pleneri, aqynnyń orys tilinde jaryq kórgen «Vozvrashenie lastochki» kitabynyń jáne Túrki elinde álemniń 6 tiline aýdarylǵan jinaǵynyń tusaýkeseri boldy. Sondai-aq «Hantáńiri» teatry «Aqqýlar uiyqtaǵanda» poemasyn, B.Rimova atyndaǵy drama teatry «Qosh mahabbat» qoiylymyn sahnalaǵan bolatyn.
