Aqtóbede karantin talabyna qaramastan, qoǵamdyq kólikter jolaýshylardy lyq toltyryp mingizip alýda. Osyǵan orai, avtobýstardy tekserý bastaldy, dep habarlaidy QazAqparat.
Aqtóbe qalasynda karantin rejimi 6 sáýir kúni engizilgen bolatyn.
Oblystyq Taýalar men kórsetiletin qyzmetterdiń sapasy men qaýipsizdigin baqylaý departamentiniń basshysy Nursulý Berkimbaevanyń qaýlysyna sai qoǵamdyq kólikter tańerteń, túste jáne keshke 2-3 saǵattan júretin bolyp bekitildi. Sonymen qatar jolaýshylar salon ishinde otyrýy tiis. Al artyq adam bolsa, karantin rejimin buzǵan bolyp esepteledi.
«Karantin jariialanyp, qoǵamdyq kólik tek arnaiy belgilengen ýaqytpen júredi. Salonǵa adamdy kóp mingizý boiynsha qazir turǵyndar tarapynan shaǵym bar. Tekserý jumystary bastaldy. Qaladaǵy eki tasymaldaý kompaniiasyna eskertý berildi. Eger karantin rejimin buzý qaitalansa, júrgizýshi men kondýktordy jumystan shyǵarý máselesi qaralady», - dedi Aqtóbe qalalyq turǵyn úi-kommýnaldyq sharýashylyq bóliminiń basshysy Bekbolat Nurashev.
Qazirgi kezde qoǵamdyq kólik sany úsh esege qysqaryp, barlyǵy 60 avtobýs 52 baǵyt boiynsha kúndelikti qyzmet kórsetip júr.
Aita keteiik, avtobýspen qatynaityn aqtóbelikter karantin rejimin saqtaý múmkin emes ekenin aityp, áleýmettik jelilerge foto, video júkteýde.
«Biz Nur-Aqtóbe yqshamaýdanynda turamyz. Tańerteń bir avtobýsqa syimai, ekinshisine minýge týra keldi. Sóitip joldasym jumysqa keshigip bardy», - deidi qala turǵyndarynyń biri.
