«Karantindegi juldyz» jobasy óner adamdary árdaiym halyqpen birge ekendigin dáleldei tústi.
Mundai pikirdi «Qazaqkontsert» memlekettik kontsert uiymynyń direktory Jeńis Seidýllauly bildirdi, dep habarlaidy QazAqparat tilshisi.
«COVID19» pandemiiasyna bailanysty karantin tártibi, sonyń saldarynan paida bolǵan keibir qiyndyqtar men ýaqytsha daǵdarys el ishinde birqatar alańdaýshylyq týǵyzdy. Biraq Memleket basshysy Qasym-Jomart Kemeluly aitqandai, árbir daǵdarystyń eki jaǵy bar. Birinshiden, bul – qaýip, ekinshiden, bul – múmkindik. Biz úshin karantin óner salasyn jańasha damytýǵa úles qosatyn jańa múmkindikter kezeńine ainaldy. QR Mádeniet jáne sport ministrligine qarasty barlyq óner ujymdary onlain keńistikti qarqyndy igerip, kórermen qaýymǵa jaqyn bola tústi», - dedi ol.
Uiym basshysynyń atap ótýinshe, 23 naýryzdan bastap QR Mádeniet jáne sport ministrliginiń bastamasymen Qazaqkontsert pen Qazaqtelekom uiymdary birlesip, Live formatyndaǵy «Karantindegi juldyz» atty jańa jobany bastady. Onlain ómirge jáne áleýmettik jelilerge bet burǵan halyqtyń bos ýaqyty paidaly, tiimdi ári pozitivti ótýine bul joba zor úles qosýda. Bailanys salasynyń kóshbasshysy «Qazaqtelekom» AQ-nyń zor múmkindikteri arqyly «Karantindegi juldyz» jobasy barsha halyqqa jáne elimizdiń shalǵai jatqan óńirlerine qoljetimdi bola aldy.
«Qazirgi ýaqytta jobamyzdy tek qazaqstandyq kórermen ǵana emes, sheteldikter de tamashalaitynyn baiqaýǵa bolady», - dedi Jeńis Seidýllauly.
Onyń aitýynsha, joba aiasynda tanymal qazaqstandyq óner juldyzdary men Qazaqkontserttiń ártisteri jandy daýysta jáne onlain formatta óner kórsetedi. Ónersúier qaýymǵa ártúrli baǵyttaǵy – folklorlyq, estradalyq, klassikalyq jáne ult aspaptyq oryndaýda kontsertter usynylmaq. Jobanyń basty artyqshylyǵy – kórermen qaýym úiden shyqpai, súiikti ánshileriniń ónerin úidegi jaily atmosferada tamashalai alady. Buǵan qosa, kontsert barysynda tyńdarmandar óner juldyzdarymen tikelei suhbattasyp, oi-pikirlerin bildire alady. Kontsertter Qazaqtelekomnyń Kazakhtelecomkz YouTube arnasy arqyly tegin kórsetiledi.
Osy kúnderi Roza Rymbaeva, Jeńis Seidýllauly, Jubanysh Jeksenuly, Ǵadilbek Jańai syndy belgili ánshiler ózderiniń onlain kontsertterin berip úlgerdi. Kontsertter kórermenniń yqylasyna bólenýde. Tipti 26 naýryz kúni ótken Roza Rymbaevanyń onlain kontsertin Memleket basshysy da joǵary baǵalap, kontsertti halyqtyń rýhyn kóteretin naǵyz óner týyndysy dep baǵalady. Aldaǵy ýaqytta Sáken Maiǵaziev, Medeý Arynbaev, Qurmash Mahan, Móldir Áýelbekova, Nurjan Kermenbaev jáne basqa artisterdiń kontsertteri ótedi.
«Karantindegi juldyz» jobasy óner adamdary árdaiym halyqpen birge ekendigin, qiyn kezeńde bir-birimizge qashyqtan da qoldaý kórsete alatyndyǵymyzdy dáleldei tústi. Jalpy alǵanda, áleýmettik jelilerdi paidalana otyryp, Qazaqkontsert ózge de tyń jobalardy qolǵa aldy. Olardyń qatarynda: «Bir ánniń tarihy», «Mýzykalyq aspapta oinaý» insta-úiirmesi, úzdik kontsertterdiń beinejazbalaryn kórsetý jáne basqalary bar. Meniń oiymsha, osyndai onlain jobalar qazirgi kezde asa ózekti. Bul jobalar bizge tek ýaqytty paidaly ótkizý ǵana emes, eń bastysy – halyqqa rýhani azyq berý, demeý bolý jáne ónerimizdi nasihattaý úshin qajet. Mádeniet pen óner – bul qashan da halyqtyń rýhani dińgegi, sarqylmas qazynasy ekenin umytpaǵan jón», - dedi Jeńis Seidýllauly.
