QR Indýstriia jáne infraqurylymdyq damý ministrligi karantinge jabylǵan óńirlerdegi halyqtyń jekelegen sanattarynyń kommýnaldyq shyǵyny úshin 15 myń teńgeden aýdarylatynyn málim etti, dep habarlaidy "Ult aqparat".
«Prezident tótenshe jaǵdai men karantin ýaqytynda turǵyndardyń kommýnaldyq qyzmetke tóleitin aqysynyń mólsherin azaitý boiynsha júieli sharalardy ázirleýdi tapsyrdy. Ony oryndaý aiasynda QR Indýstriia jáne infraqurylymdyq damý ministrligi kommýnaldyq qyzmetti jetkizýshilermen kelisimsharty bar tutynýshylar úshin kommýnaldyq qyzmetti tóleýdi qarastyratyn tetik ázirledi», - dedi ministrlikten.
Naqtyraq aitqanda, karantin engizilgen óńirlerde ákimdikter tutynýshylardyń derbes (abonenttik) shottaryna 2 ai boiy 15 myń teńgeden aýdaryp otyrady. Memlekettik organdardyń usynysy negizinde tólem alýshylardyń kelesi sanattary aiqyndalǵan. Olar:
- 1, 2, 3 top múgedekteri;
- múgedek balalardy tárbielep otyrǵan otbasylar;
- kópbalaly otbasylar;
- UOS múgedekteri men qatysýshylary, UOS múgedekteri men qatysýshylaryna teńestirilgen tulǵalar;
- memlekettik nemese qoǵamdyq mindetterin, áskeri qyzmetin oryndaý barysynda, ǵarysh keńistigine ushýǵa daiyndyq barysynda nemese ushý kezinde, adam ómirin qutqarý jáne quqyq tártibin saqtaý kezinde qaza tapqan tulǵalardyń otbasylary;
- tómen jáne odan az zeinetaqy alatyn zeinetkerler;
- ataýly áleýmettik kómek alatyn azamattar, onyń ishinde jalǵyzbasty zeinetkerler.
«Tólemdi alý úshin tutynýshy aqparattyq júieler nemese call-ortalyq arqyly jeke sáikestindirý nómirin, áleýmettik dárejesin jáne derbes shot derekterin kórsete otyryp, ákimdikke ótinim berýi kerek. Ákimdik usynylǵan derekterdi tekserip, málimetter ras bolǵan jaǵdaida kommýnaldyq qyzmetter tutynýshysynyń derbes (abonenttik) shotyna qarjy aýdarady», - delingen habarlamada.
Indýstriia jáne infraqurylymdyq damý ministrligi ákimdikter tutynýshylardan ótinimderdi qabyldap, olardyń rastyǵyn tekserýdi durystap uiymdastyrýy kerektigin eske salyp otyr.
