Jambyl oblysynda tótenshe jaǵdai kezindegi jumystardy utymdy uiymdastyrý maqsatynda oblystyq shtab janynan jedel áreket etý ortalyǵy qurylady, - dep habarlaidy Jambyl oblysy ákimdigi.
Ol týraly oblystyq jedel shtabtyń kezekti otyrysynda aityldy. Basqosý barysynda Taraz qalasynyń ákimi Aitqazy Qarabalaev karantindik rejim jaǵdaiynda qabyldanyp jatqan sharalar týraly habarlady. Sondai-aq, aýmaqtardaǵy jaǵdai týraly Qordai, Merki jáne Moiynqum aýdandarynyń ákimderi Rústem Dáýlet, Meiirhan Ómirbekov, Máden Musaev baiandady.
- Jaǵdai kúrdelene túsýde. Bul bizden barynsha kúsh-jigerdi, jedel sheshimder men naqty is-áreketterdi talap etedi. Ókinishke qarai, bizdiń turǵyndardyń kópshiligi tónip turǵan qaýipti sezinbei otyr. Buǵan Taraz qalasyndaǵy kórinister dálel bola alady. Keshegi kúnnen bastap oblys ortalyǵynda karantin jariialanyp, adamdarǵa ózderin oqshaýlaý boiynsha shekteý engizilgen. Alaida qala kóshelerinde avtokólikpen júrgenderdiń qarasy azaiar emes. Mundai karantinnen qandai nátije kútýge bolady? – dep atap ótti oblys ákimi Berdibek Saparbaev.
Sondai-aq, aimaq basshysy blokposttarda tiianaqtylyq joqtyǵyn, olardyń keibireýi áli kúnge deiin tiisti túrde jabdyqtalmaǵanyna nazar aýdartty. Tarazda karantin jariialanǵannan keiin qalanyń kireberisinde avtokólik keptelisi baiqalǵan. Bul máseleni dereý sheshý kerektigi aityldy. Bul bankterdegi tolassyz kezekterge de qatysty. Ásirese turǵyndarmen tyǵyz jumys jasaityn Halyq banki bólimsherinde atalǵan túitkil kórinis tabýda. Turǵyndardy tamaq ónimderimen qamtamasyz etý jáne birinshi kezektegi qajetti taýarlardyń baǵasyn baqylaýǵa bailanysty máseleler ózekti bolyp qalýda.
Jiynda oblystyq shtab janynan jedel áreket etý ortalyǵy qurylatyny aityldy. Ol shtabtyń jumysshy organy bolady. Ol jeti baǵyt boiynsha jumys isteidi:
- Taraz qalasy men aýdandardyń blok-beketteriniń, shtabtarynyń jumysyn úilestirý;
- meditsinalyq, sanitarlyq-epidemiologiialyq qaýipsizdik;
- azyq-túlik qaýipsizdigi;
- jeke tulǵalardyń, kólik pen taýarlardyń qozǵalysyn baqylaý;
- áleýmettik qorǵaý, eńbek qatynastary;
- oblystyń tynys-tirshiligin qamtamasyz etý;
- halyqty aqparattandyrý.
Ortalyqta óńirdegi ahýal týraly barlyq aqparat jinaqtalyp, saralanyp, eń ózekti máseleler boiynsha aldyn ala sheshimder ázirlenip otyrmaq. Ortalyqqa tóraǵalyq etý oblys ákiminiń birinshi orynbasary Bekbolat Orynbekovke júkteldi.
