Qazaqstan strategiialyq zertteý institýty direktorynyń orynbasary Sanat Kóshkimbaev Qazaqstanda aldaǵy ýaqytta da karantin talaptaryn saqtaý mańyzdylyǵy jóninde pikirin bildirdi, dep habarlaidy QazAqparat.
«Bizdiń eldiń biliginiń sheshimimen qabyldanǵan naqty sharalar, atap aitqanda tótenshe jaǵdai rejimi men karantinniń engizilýi – elde koronavirýs infektsiiasynyń taralýyna edáýir shekteý qoia bildi. Alaida Memleket basshysy Qasym-Jomart Toqaev Qazaqstanda tótenshe jaǵdai rejimin qamtamasyz etý jónindegi memlekettik komissiianyń kezekti otyrysynda atap ótkendei «epidemiia tolyǵymen jeńilgen joq, azamattardyń áli de bolsa densaýlyǵyna qaýip tónip tur». Sol sebepti karantin shekteýiniń kezeń-kezeńmen alynýy oiǵa qonymdy qadam», - deidi Sanat Kóshkimbaev.
Sarapshy Qazaqstanda koronavirýs infektsiiasyn juqtyrǵan alǵashqy azamat 13 naýryzda tirkelgenin, osydan keiin úsh kún ótken soń elde tótenshe jaǵdai jariialanǵanyn eske saldy.
«Dúniejúzilik densaýlyq saqtaý uiymy 11 naýryzda álemde koronavirýs infektsiiasynyń taralýy pandemiia sipatyna ótkenin málimdep, memleketterdiń úkimetterin «shuǵyl ári agressivti sharalardy» qabyldaýǵa shaqyrǵan edi. 16 naýryzdan bastap 11 mamyrǵa deiin Qazaqstanda tótenshe jaǵdai rejimi kúshinde boldy. Al 19 naýryzdan bastap aldymen elordada, sodan keiin Almatyda karantin sharalary kúshine ene bastady. Osy qadamdardyń bári de qolda bar resýrstardy mobizizatsiialap, qaýipti azaitýǵa septigin tigizdi», - deidi ol.
Sanat Kóshkimbaev bul rette el biligi qabyldaǵan shekteý sharalarynyń bári de qazaqstandyqtardyń qoldaýyna ie bolǵanyn málim etti. Onyń paiymyna súiensek, eldegi shekteý sharalarynyń arqasynda Qazaqstan koronavirýstyń sharyqtaý shegin barynsha az shyǵynmen qarsy alǵan. Al máselen álemniń birqatar elinde, atap aitqanda AQSh, Italiia, Ulybritaniia, Ispaniia elderinde koronavirýs infektsiiasy boi bermeitin sipatqa ie bolyp ketken. Máselen 17,5 million turǵyny bir ǵana Niderlandy elinde koronavirýs juqtyrǵandardyń sany 42 myńnan asyp ketken. 5,4 myń adam kóz jumǵan. Oǵan kórshiles jatqan 11,5 million turǵyny bar Belgiiada 53 myń adam aýrýdy juqtyryp, 13,5 myń adam baqilyq bolǵan.
«Sol sebepti tótenshe jaǵdai rejiminiń 11 mamyrda aiaqtalýy – karantin sharalarynyń alynyp tastalǵanyn bildirmeidi. Elde jáne álemde sanitarlyq daǵdarys áli de kúshinde. Karantin sharalarynyń bárin ary qarai da ustanǵan abzal. Áleýmettik ara qashyqtyqty saqtap, maska taǵyp, jumys oryndarynda dezinfektsiia júrgizip, sebepsiz úiden shyqpaý kerek. Qytai men Ońtústik Koreianyń tájiribesi kórsetip otyrǵandai karantin sharalaryn bir kisidei saqtasaq, koronavirýs pandemiiasyn barynsha az shyǵynmen ótkeremiz. Qaýiptiń betin qaitaratyn basqa tiimdi amal joq. Tiisinshe bizdiń azamattar sabyrǵa tór berip, shekteý sharalaryn saqtaýy tiis», - dep túidi sarapshy.
