«Atameken» UKP basqarma tóraǵasy Abylai Myrzahmetov koronavirýs saldarynan jumysy qiyndaǵan kásipkerler týraly aitty, dep habarlaidy QazAqparat.
Búgin Ortalyq kommýnikatsiialar qyzmetinde ótken baspasóz máslihatynda koronavirýs indetiniń saldarynan qansha kásipker jumysyn jandandyra almai otyrǵany suraldy.
«Indet kásipkerler jumysyna eleýli qiyndyqtar alyp keldi. Bizdiń orta esep boiynsha karantinde qyzmet kórsetý salasyndaǵy 800 myńnan astam kásipker qiyndyqqa tap boldy. Sanitarlyq dárigerlerdiń buiryǵyna sáikes, olardyń 500 myńnan astamynyń jumysy toqtap turdy. 17 tamyzdan bastap jumystaryna kiristi», - dedi A. Myrzahmetov.
Onyń sózine qaraǵanda, áli de jumysyn bastai almai otyrǵan kásipkerler bar. Osy oraida qoǵamdyq tamaqtaný salasyndaǵy ashanalar, meiramhanalar men dámhanalar tolyq kúshinde jumysqa kirispedi. Ashanalar óziniń shyǵynyn ótei almaǵannan keiin, jumysyn tiisti deńgeide bastai almai tur.
Budan buryn habarlanǵandai, A. Myrzahmetov kóleńkeli ekonomika negizinen saýda salasynda bolyp otyrǵanyn aitty.
