Nur-Sultan qalalyq Politsiia departamentiniń basshysy Erjan Sádenov qala mańyndaǵy arnaiy beketterdiń jumysyn baiandady, dep habarlaidy "Ult aqparat".
«Nur-Sultan qalasyna avtokólik quraldarynyń kirýine jáne shyǵýyna shekteý engizildi. Qalaǵa kiretin barlyq jerler jabylyp, 6 arnaiy qadaǵalaý beketi qoiyldy. Olarda táýlik boiy Qorǵanys ministrliginiń áskerlerimen birge politsiia qyzmetkerleri jumys isteidi. Beketter elorda mańyndaǵy Jibek joly, Qosshy, Talapker, Qaraótkel, Qoiandy aýyldarynyń mańynda ornalasqan», - dedi departament basshysy Ortalyq kommýnikatsiialar qyzmetinde.
Sonymen birge, Almaty, Kókshetaý, Qostanai, Pavlodar qalalary men Aqmola oblysynyń Qorǵaljyn jáne Qabanbai batyr aýyldary syndy barlyq baǵyttaǵy avtojoldarda qozǵalys shekteledi.
«Buǵan deiin qala aýmaǵynan shyǵyp ketip, qaita oralǵan Nur-Sultan qalasynyń turǵyndaryna ǵana basymdyq beriledi. Bul rette ózimizdiń tirkeý esepterimiz arqyly tekseremiz, eger tirkeý jáne kýálandyratyn qujattar bolsa, qalaǵa kirýge ruqsat berilýi múmkin. Mundai sharalar azamattardyń qaýipsizdigin qamtamasyz etý jáne halyqtyń densaýlyǵyn saqtaý úshin qajet», - dedi E. Sádenov.
Osyǵan deiin karantin jariialanǵan Nur-Sultan men Almaty qalalaryna blokposttar qoiylyp, kólik pen azamattardyń qozǵalysy shekteletini habarlanǵan edi.
Eki megapoliske kirip-shyǵýǵa ruqsat berilgenderdiń tizimin ákimdikter anyqtaidy.
